Breinumzeme

Lovūtīs pa asvalteitajim celenim, lai nasamierceitu kuojis, īsadūmojūs, ka asu Alise breinumzemī. Kuodreiz gribīs vysmoz dūmuos pabyut tī, kur sovaiduok. Kuo jau vairums cylvāku myusdīnuos bez škārsteikla naizteiku, dažys pierstu kombinacejis i jau asu cytā pasaulī. Kuram jei ir zaļā, kuram zylā, rozā, zaļā voi dzaltonā kruosā. I cīš daudzim malnā, i puoruok daudzim…

Tik daudzi biedeigūs, sāru pylnūs stuostu, dzejūļu, ka palosūt tuo vin gribīs skrīt zam deča pasasliept. Dzeive jau poša par sevi pa breižam nav vīgla. Navajag bādys iztaiseit tik svareigys i lapnys, par jom veļ dzejūļus i stuostus sarokstūt. Paceļojūt pa škārsteiklu, atrodu vīnu dzejūli, kū sarakstiejs kuods dzeivisprīceigs i smaideigs students:

Nē, tomēr nav jau i tik slikti
Ja kabatā ir biezi maki.
Ja sēž pašā labākajā mašīnā
Ja televizors ir pat vannas istabā.
Ēst omārus no rītiem,
Apreibināties ar 1400. gada vīniem.
Un staigāt uz sabiedrības krējuma banketiem
Atbildēt uz “Privātās Dzīves” jautājumiem…
Ai, kū tī daudz, ūksta,
Dzeivoju kojuos, Muns transpotrs – maršrutkys
Kabatā saņtimi viņ skaņ,
A kas maņ –
Vokorā peļmeņus pīvuorāt iz plitys
A potom padzert miniralkys.
Nu a vāļ vālok i ola
Eisuok, labi maņ i tai toža.

He, varātum jau pīsasīt par gramatiku, par izvālātajim vuordim, ritmu, voi vēļ kuodu poša cylvāka izdūmuotu kriteriju (kuo itais vuords byus latgaliski?), bet nā – pateik maņ tei dūma – ir labi tuo, kuo ir! I gona!

Lai justūs labi, nav juobrauc iz Egipti voi Spaneji, bet juopasaver iz sovu ikdīnu cytom acim… I tod jau saprassi, ka golu golā i pošu zeme raižom kuo breinumzeme…