Nūskaidruots konkursa „Latgolys prozys skaitejumi 2020” uzvarātuojs

Literarūs prozys tekstu konkursā „Latgolys prozys skaitejumi 2020” nūskaidruota uzvarātuoja  tekstilmuokslineica i rakstneica Annele Slišāne. Jei skaiteja eisstuostus “Tuoraga kule”, “Ai tuoraga tortu gostūs” i “Vilcīnā” i pīsadaleis storptautyskajā literaturys festivalā “Prozas lasījumi 2020”, pyrmū reizi festivala autoru vydā byus ari lobuokais Latgolys prozys autors.

Latgolys regiona autoru prozys tekstu konkurss itūgod tyka izsludynuots pyrmū reizi, jū organizēja bīdreiba “LgSC”. Dorbu viertiešona nūtyka div kuortuos. Pyrmajā kuortā žureja aizkluotai viertēja vysus īsyuteitūs tekstus, izalosūt lobuokūs daleibai ūtrajā kuortā. Pandemejis īrūbežuojumu deļ ūtruo kuorta nanūtyka kluotīnē, kai suokumā beja īcarāts, bet autori sovus tekstus skaiteja kamerys prīškā Rēzeknē. Žureja nūsavēre tekstu skaitejumus video i izavielēja uzvarātuoju.

Autori tyka aicynuoti konkursā īsyuteit da tuo napublicietūs tekstus latgalīšu rokstu volūdā voi latvīšu literarajā volūdā. Dorbi tyka vārtāti, vysu vaira izceļūt na teksta volūdu, bet literaruo teksta kvalitati i pīdareibu Latgolys kulturtelpai. Konkursa „Latgolys prozys skaitejumi 2020” dorbus viertēja literaturzynuotneica i Austrumlatvejis literaruos akademejis vadeituoja Maija Burima, rakstneica Laima Kota, dzejneica Anna Rancāne i  literaturzynuotneica i dzejneica Iveta Ratinīka.

Rakstneica Laima Kota, rezumejūt sovu pīredzi, soka: “Itymus laikūs byut rakstnīkam — tur dūmuot vajag, lai kū tik napraktisku dareitu ai prīku! 🙂 Vysim autorim — sirsneigs paļdis! Laseišona ci stuostu skaiteišona beja cīši interesnuo līta, nu tīsys prīceigi, ka ir jauni autori, kuri cer ai vuordu puormaineit pasauli.”

Konkursa uzvarātuojis teksts video radzams ite: www.youtube.com/watch?v=Ri0OKlqyt_I

Rakstneicai Annelei Slišānei cyta goda suokumā izīs prozys gruomota  “Tuoraga stuosti”. Konkursā atzineibu giva autoris īsnīgtais eisstuostu ciklys nu ituos gruomotys manuskripta.

Slišānis īprīkšejuo gruomota i tekstilmuokslys projekts “100 deči Latvijai” beja duovona Latvejis dzimšonys dīnā. Symtgadeigūs stuolūs Latgolā i Reigā nūaustī deči tyka izstuodeiti daudzās vītuos Latvejā i pīsaisteja viereibu ar dzili personeigā pīredzē sakņuotim i aužūt pīraksteitim stuostim, kas apkūpuoti gruomotā. Tymā pošā godā autore īgiva latgalīšu kulturys goda bolvu “Boņuks” par tekstilmuokslys i literaturys projektu “#100dečiLatvijai”.

Jaunajā gruomotā “Tuoraga stuosti” apkūpuoti stuosti par bīzpīnu, reizē — par sīvītem myusu dīnu sabīdreibā. Autore soka: “Tuorags kuo metamorfoze. Stuosti par izaugšonu. Par cylvaka izaugšonu, izaugšonu caur vusuom suopiem i puorbaudejumīm. Par izaugšonu par cylvaku. Par sīvīti.”

Konkursa nūrisi atbaļsteja SIA “Zeize”. Uzvarātuoja sajims uzjāmuma sagatavietū duovonu karti pakolpuojumu voi preču sajimšonai salonā “DekoPrint” Rēzeknē, Atbreivuošonys alejā 112. Konkursa video sataiseiti ar Vaļsts Kulturkapitala fonda finansialu atbolstu projektā “Digitālā Latgale portālā lakuga.lv”.

Konkursa organizatori bīdreiba “LgSC” apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysu pyrma atbaļsteit jaunūs latgalīšu autorus i izdūt kvalitativu literaturu, viereibu dagrīžūt jaunīšu auditorejai.

Itūgod storptautyskais literarais festivals “Prozas lasījumi 2020” nūteik tīšsaistē, jū organizej Latvejis Rakstnīku savīneiba. Laika gaitā „Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki.

Ziņu sagataveja konkursa koordinatore Ilze Sperga, Tel. 29512432, e-posts ilze@lgsc