Latgolys radejis zinis (12.09.2008.)
Šudiņ Latgolys apgoboltīsa pasludynuos sprīdumu trejom kukuļjimšonā apsyudzātom vaļsts omotpersonom. Par dīnesta stuovūkļa ļaunpruoteigu izmontuošonu i kukuļjimšonu apsyudzātajam Vaļsts tehniskuos uzraudzeibys agenturys Daugavpils regionaluos dalis vacuokajam inspektoram 1969. godā dzymušajam Mārim Šaršūnam prokurors pīprasejs četru godu cītumstruopi. Saskaņā ar apsyudzeibu kukuļs, 60 latu apmārā, omotpersonai dūts kab nūdrūšynuotu kukuļdeviejam traktora vadeituoja aplīceibys izsnīgšonu bez praktiskūs i teorētiskūs puorbaudejumu nūkuortuošonys.Šudiņ Rēzeknē turpynojās 5. starptautiskais teatru festivals “Sūli pa sūļam”. Itūgod festivals riezeknīšim pīduovuos 10 Latvejis, Lītovys, Boltkrīvejis i Spanejis teatru 10 izruodis. Šudiņ teatrī “Joriks” 14 stuņdēs Salaspils teatris spēlēs jaunīšu kriminalkomedeju “Makss i Morics”. 16 stuņdēs i 30 minotuos Rēzeknis kulturys nomā Jākubpils Tautys teatrs skateituojim pīduovuos Mārys Zālītes stuostu “Zemis nūdūklis”. Ar muzikalu komedeju “Toreodori bez robežām” teatrī “Joriks” septeņūs vokorā iz skatuvis kuops festivala gosti nu Spanejis – Colesterol Teatro. Sovukuort gosti nu Lītovys Roķišķu Tautys teatris ar izruodi “Slozds” kuops iz skatuvis Rēzeknis KN deveņūs vokorā.
Šudiņ ar plašu pasuokumu programu gon pīaugušajim, gon bārnim i jaunīšim Rēzeknis rajona Bierzgalis pogostā nūtiks 7. gruomotu svātki. Itūgod Gruomotu svātkūs daleibu jims 20 Rēzeknis rajona pogostu publiskuos bibliotekys i pīcys školu bibliotekys. Pasuokuma golvonī organizātuoji i Lauku biblioteku atbolsta bīdreiba, Bierzgalis pogosta padūme i Rēzeknis rajona padūme.
Šudiņ Daugavpils dzeivuotuojus i gostus prīcēs Nacionalūs bruņuotū spāku Sauszemis spāku orkestra koncerts. Tys suoksīs 12 stuņdēs i nūtiks Vīneibys laukumā. Jau ziņuots, ka NBS orkestru koncertu leluokajuos piļsātu īluos nūteik, atsasaucūt aizsardzeibys ministra Vineta Veldris īrūsynuojumam veiduot jaunys militaruos tradicejis.
