Latgalīšu volūda radejā i televizejā byus ari 2014. godā
“Svareiguokais, ka Latvejis Radeja jau ir īkļuovuse, bet Latvejis Televizeja ir apsajāmuse īkļaut sovūs 2014. goda darbeibys planūs (attīceigi ari budžetūs) regularus raidejumus latgalīšu volūdā,” gondarejumu pauž Saeimys deputats Jurs Viļums. „Prīca, ka da šam īsuoktī dorbi itymā jūmā tiks turpynuoti.”
Piec Reformu partejis deputata Jura Viļuma īrūsynuojuma 25. septembrī Saeimys Pīprasejumu komisejā tyka skateits vaicuojums par latgalīšu i lībīšu volūdys īspiejom skanēt vaļsts televizejā i radejā ari nuokamajā godā.
Pīprasejumu komisejis sēdē pīsadaleja bīdreibys „Latgolys Saeima” vaļdis prīšksādātuojs Valdis Labinskis, kurš atguodynuoja, ka tautys skaiteišonā 8% Latvejis īdzeivuotuoju atzyna latgalīšu volūdys lītuošonu kasdīnā, leidz ar tū lītdereigi byutu īzeimēt vysmoz 2% limitu, kas nūsaceitu latgalīšu volūdys eipatsvoru vaļsts plošsazinis leidzekļūs. Lai gon itys skaitlis ni tivai nav sasnīgts, latgalīšu navaļstiskuos organizacejis apsveice vysmoz regularu raidejumu veiduošonu.
Vaļsts volūdys centra puorstuovi aplīcynuoja, ka nav obligatys praseibys latgalīšu volūdys tekstim televizejā pīvīnuot subtitrus latvīšu literarajā volūdā, lai ari tim ir pīteikami vierteiga izgleitojūša funkceja.
Diskuseja par latgalīšu i lībīšu volūdys lītuojumu medejūs ir saisteita ar Vaļsts volūdys lykumu (3. panta 4. daļa), kurā ir nūsaceits, ka vaļstei juonūdrūsynoj latgalīšu rokstu volūdys (kai viesturiska latvīšu volūdys paveida) saglobuošona, aizsardzeiba i atteisteiba. Sovukuort 2013. goda pavasarī Saeima izdareja lobuojumus Elektroniskūs plošsazinis leidzekļu lykumā, kurā tīšs aizdavums attīceibā gon iz latgalīšu volūdu, gon lībīšu volūdu teik dūts sabīdriskajim elektroniskajim plošsazinis leidzeklim.
Ziņu sagataveja: LaKuGa pie Saeimys deputāta J. Viļuma snīgtuos informacejis
