dūmu pylni pogolmi/juļs
Kosmopolits. Taida ir muna tagadejō diagnoze. Interesejūs par kosmosa politiku. Tai tulkōtu nazynōtōjs. Gon jōsoka, ka daļa taisneibys tī ir. Bet es šū reizi nagrybu īdziļinōtīs psiholoģiska rakstura interpretacijōs. Es vīnkōrši strōdoju restoranā. I restorans naatsarūn munā dzimtenē.
Ļaujit jyusus īsādynōt lelā, lelā panoramys rotā, nu kura paverās skots iz kosmopolīta-īsōceja ikdīnu.
Jau treis cilvāki man ir parōdiejuši, kai teik lūceitys salvetis. Es naasu, prūtams, nikaids origami meistars, bet man pītika tikai pasavērt iz golda nūformejumu i es saprotu, kas i kai ir dorams. Vīnkōrši šei ir tei tauta ar „ETPKIL” sindromu – es tev parōdiešu,kai izdareit lobōk. Man tikai jōstōv i jōsmaida.
Sovā zinā šei ir nūlōdāta vīta. Mozam, nīceigam kosmopolitam atsagoda ķibelis vīna pēc ūtris. Divis glōzis saplāstis. Trešō saplēse mani. Īmasls – ignorātis fizikis stundis vydusskūlā. Jā, jā – pōrōk daudz dvīļa veina glōzi izraisa lauskis. Tagad muna plauksta ir divōs vītos sašiuta ar malnu dīgu. Es gon gribēju ar zilu. Redz, procedura pi ōrsta nūtyka tik ōtri, ka napaspēju izsaceit sovys klienta vēlmis.
Vēļ es breinojūs, kur var tik daudz ola dzert. Laikam futbols pi vainis. Lai gon, vīnu vokoru jau i mani paspēja pīdzirdeit. Gords ols!
Jamūt vārā munu pusinvalida stōvūkli, man ir daudz breivō laika. Lai, pīmāram, aizītu leidz jyurai, kas cytā krostā munu dzimteni īskauj. Lai pōrītu bosom kōjom pa svešinīku izlītu asfaltu. Lai nūpierktu beidzūt škiltovys. Nā, nā, es napeipeju. Es dzeivoju treilerī. Te ir gāzis plita i ladusskaps, kurā sasolst vyss – banani, pīns, maize. Bet kai tūpūšajam kosmopolītam, man ir jōmōk adaptētīs jebkurim apstōkļim. Tys nikas, ka naktī solts i pa dīnu sakorst kai syltumneica. Iudina ari nav iz vītis. Ekstremala ikdīna.
Cylvāki dažaidi. Uh, cik dažaidi! Tys ir tik aizraujūši! Desmitim krōsainu dvēseļu. I muna pa vydam. Tū sauc par internacionalu ikdīnu. Ej, ej, voi tik mes pamozam nasasamaisam vysi vīnā pasauleitī!
Es pasarakstiejūs šaidai aferai. Beja jūceigai pamest īrostū vidi. Bet šeit byudama, saprūtu, ka taidu pīredzi naatsvārtu nikaida cyta vosorys nūdarbe.
„Naz kai tī, saucamajā dzimtenī…
Voi tī naskōbst pīns gūvs tesmenī?”
Žāl, ka lauki izgaist. Taidi vairs jau byus dreiži tikai iz mēness. Bet tei jau ir cyta tema.