Sovvaļnīks aicynoj atsagrīzt bierneibā

Latgalīšu melanholiskais rokmuzikis Sovvaļnīks īrakstiejs jaunu dzīsmi, ar kurys paleidzeibu car sevkuru padareit drupeit labesteiguoku. Dzīsme klausoma radeju stacejuos i škārsteiklā, kai ari teik pīduovota LaKuGys skaiteituojim!

Latgolā, vysā Latvejā i starptautiski atzineibu givušais solo muokslenīks Sovvaļnīks piec debejis albuma izdūšonys īprīškejā vosorā izsuocs dorbu pi jaunuo studejis albuma, kas byus veļtejums aizsaulē aizguojušam nūvodnīkam i dzejnīkam Ontonam Kūkuojam septeņdesmit godu jubilejā. Vuordi vysom dzīsmem gaidomojā albumā – O.Kūkuoja ailis.

Sovvaļnīks klauseituoju viertiejumam nūdūd pyrmū dzīsmi ar nūsaukumu “Visums”, tei īraksteita latvīšu volūdā, jamūt vārā lobuos atsauksmis piec dzīsmis “Pats Sevī Dzeivs” jaunuos versejis latvīšu volūdā prezentiešonys itymā pavasarī. Dzīsmi muzykys eksperti Skandinavejis valstīs raksturuojušs kai trauslu, izjustu, smeļdzeigu i sirsneigu breinumu. Tys ir aicynuojums sevkuram pīminēt bierneibu – gaišumu i vīglumu, ar kaidu tod pavadeita kas dīna. Sovvaļnīks: “Es nacaru, ka sevkurs, nūsaklausūt itū dzīsmi, klius lobs, nu cara, ka tei izrunuos dzili i liks aizadūmuot par lobū i koč drupeit aizmierst švakū. Cylvāks piec dobys ir lobs, tik apleik pasauļs myus sabūjoj. Ar itū dzīsmi, kas topus romantiskā stylā, izmontojūt ar zvaneņus i šveikstus, grybu paleidzēt guodūs aizīt pa celi nu myusu dīnu ryupem i problemom, i atsarast, pīmāram, rosys pylnā pļovā agrā reitā. Pasapinejit!”