Latgalīšu teatrs

Pādejā laikā suoču fanuot par Jaunuo Reigys teatra izruodem, koč ari pošam vēļ nav saguojs ni iz vīnu tikt (pagaidam)… Munupruot, taids “jauns” formats varātu byut ari latgalīšu teatra atdzimšonys panuokumu pamats. Bet tod atguodovu, ka nu jau pavysam dreiž – reit (22.04.2010) Daugpiļs teatrī juobyut “Klepernīku pogosta zvaigznes” pyrmizruodei!

Nu jau pyrma vairuokim godim – precizuok 2008.goda rudinī Daugavpiļs teatris sareikova konkursu, kur 1.vītu kai lobuokuo luga latgalīšu volūdā īgive Kristīnes Jokstes (pseidonims) gora dorbs. Pats konkurss izsludynuots tyka kai reize nu jau pyrma divejim godim (2008.goda martā) – kas lānai īt, tys labi īt.

Nu tod byusim sagaidejuši lugu ari iz leluos scenys! Cik dzierdāts, tod muzyku izruodei rakstejuši “Patrioti.LG”, dīvamžāļ, par cytom niansem klusums.

Tod nu – daugavpilīši, meklejit informaceji, ejit iz izruodi i pastuosti ari myusim, kai beja. Guoduosim, ka jaunuo luga latgalīšu volūdā saceļs nalelu kataklizmu latvīšu kuļturys vydā 🙂