Vikepedeja latgalīšu volūdā – kai tys ir?
Daudzejim vēļ svaigā atminī viests par ISO koda (ltg) daškieršonu latgalīšu volūdai 2010.goda suokumā – tys beja jauns stimuls atsagrīzt ari pi vaicuojuma par sovys Vikipedejis vajadzeibu.
Vikipedeja (Wikipedia) ir daudzvolūdu enciklopedeja internetā ar bezmoksys saturu. Rokstus tymā breivpruoteigi taisa tuos lītuotuoji – kotrs var lobuot sevkuru nu rokstim, izjemūt blokietūs.
Latgalīšu Vikipedeja pagaidam dorbojās “testa režimā” jeb tai saucamajā “inkubatorā”. Tū var apsavērt ite: incubator.wikimedia.org/wiki/Wp/ltg
Kai dalikt sovu informaceji? Ekrana viersā atrūnit “Log in/create account”, tī izavielejit sovu lītuotuoja vuordu i paroli, ar jim vysod varēsit īīt Vikipdejā.
Nasabeist papyļdynuot rokstus! – sevkurs lītuotuojs var redigēt tekstu (aicynojums byut drūšim i tymā pošā laikā nabyut vandalim). Var lobuot kai roksta saturu, tai gramatiku, kai ari tik nūformiejumu) ejit i redigejit. Nikas navar iznycynuot Vikipedejis. Ka byus vajadzeiba – vysu var izgluobt i piečuok atjaunuot. Raksteisim latgaliski par Latgolys i latgalīšu vaicuojumim, tai pat ari par vysom cytom svareigom lītom iz pasauļa, ka ir taida gribiešona 🙂
Pavuiceiba, kai lobuot i davīnuot jaunus rokstus pagaidam saprūtamuoka ir latvīšu volūdā, bet tyvuokajā laikā juorauga ari tū puorlikt latgaliski: Eisa lītuošonys pavuiceiba i Plašuoka lītuošonys pavuiceiba
Latgalīšu Vikipedejis suokuma lopā (koč i testa versijā) var apsavērt jau izveiduotuos kategorejis i vysaiduoku rokstu saturu, kū kūpeigim spākim myusim daīs lobuot, kuortuot i papyldynuot.
Kū lobuoku sataiseisim itū testa versiju, tū vīgluok byus pīruodeit, ka latgalīšim ir vajadzeiga sova atseviška vikipedeja latgalīšu volūdā, kas ar laiku varātu tikt saukta kai ltg.wikipedia.org. Lai tys tai ari nūtyktu, ir pīraksteits pīprasejums: Pīprasejums
Kai izaruoda, tys ir jau trešais itaida veida pīprasejums. Tagad myusu cereibys ir leluokys deļ tam, ka ir ari dabuots ISO kods, bet jūprūjom byus vītā arī Tovs atbolsts, kū tu vari dalikt. Kai tū izdareit? Pīktajā dīnā, piec jauna lītuotuoja pīregistriešonys (kas apraksteita augstuok), Tev tiks dūta īspieja ari lobuot lopys saturu itymā pīprasejumā – taitod drusku pacīteibys.
Niu golvonais administrators pi latgalīšu volūdys vikipedejis ir Oļegs Anosovs – vikipedajā “Dark Eagle” (vysārtuok ar jū var sasazynuot caur Skype, lītuotuojvuords “dark2eagle”).
Kod byusit īsavyucejuši davīnuot i lobuot tekstus, tod kūpā apsavērsim i cytys lobys lītys, kū var dareit Vikipedejā par kurom raudziešu seikuok pastuosteit vāluok.
