Latvejai vajadzeigs latgaliskais idealisms!
2010. goda 21. martā Reigā ir dybynuota Meierovica bīdreiba par progresivom puormaiņom. Pīprosa kvalitativu, atvārtu politiku i aicynoj sabīdreibu iz aktivu leidzdaleibu, aicynoj kūpā dareit aktivus cylvākus vysā Latvejā, sasadorbuot i veiduot reģionaluos atbolsta grupys.
Sabīdreibys leidzdaleiba ir demokratejis pamats, Meierovica bīdreibys mierkis ir pulcynuot kūpā cylvākus, kam svareiga Latvejis nuokūtne i kas ir gotovi veļteit sovu laiku i energeju, īguļdeit sovys zynuošonys, kab politika Latvejā kliutu kvalitativuoka.
„Latvejai vajadzeigs myusu vysu pilsūniskais idealisms! Mes asom apsavīnovuši bīdreibā, kab Latvejis vaļstī nūtyktu vajadzeigys i lobys puormainis. XX godu symta suokumā myusu prīškguojieji prota izveiduot laikmeteigu Eiropys vaļsti. Tagad tys juovar myusim. Mes asom gotovi zīduot sovu laiku i energeju, kab Latveja kliutu par dinamisku, pašapzineigu i cīnejamu XXI godusymta rītumvaļsti. Asom apsavīnovuši bīdreibā, kab uzlobuotu myusu vaļsts politiku. Politika nav i nadreikst byut šaurys politiķu grupys nūsadarbuošona. Kotra bolsuotuoja tīseibys i pīnuokums ir leidzadareit. Mes asom apsavīnovuši bīdreibā, kab aicynuot Latvejis pylsūņus byut praseigim. Ka mes tū napīpraseisim i nadareisim poši, tod nabyus lobys školys i slimineicys, konkurietspiejeiga augstuokuo izgleiteiba, gūdeiga vide uzjiemiejdarbeibai, taidi politiki i taida vaļsts puorvaļde, kas kolpoj sovu pylsūņu interesem. Tei nasarass, ka nabyus myusu – bolsuotuoju leidzdarbeibys”, tai raksteits bīdreibys dybynuošonys manifestā.
„Meierovica bīdreiba par progresivom puormaiņom” nav politiska parteja, tei ir navaļstiska organizaceja, uorpus partejom stuovūša bīdreiba. Progresivys puormainis politikā, cilvāku leidzdarbeiba, īsasaisteišona ir vajadzeiga napuortrauktai, a na tikai reizi četrūs godūs.
Bīdreibys darbeibā byus divi virzīni: pyrmkuort, veicynuot atvārtu politiku, tiktīs ar cylvākim vysā Latvejā, aicynuot prīšklykumu formuliešonu, leidzadareit, kab nūtyktu izmainis kai vaļsts politikys, tai ari pašvaļdeibu leiminī. Ūtrkuort, puļcēt ekspertus, kab, jemūt vārā īdzeivuotuoju īsacejumus, izstruoduotu prīšklykumus, kai puormainis izdoramys.
Bīdreibys dybynuotuoju vydā ir Georgs Andrejevs, Ingrīda Blūma, Lolita Čigāne, Kristīne Drēviņa, Sarmīte Ēlerte, Jānis Garančs, Alvis Hermanis, Ojārs Kalniņš, Atis Lejiņš, Ingrīda Meierovica, Ilmārs Mežs, Uģis Rotbergs, Gustavs Strenga, Tālis Tīsenkopfs, Anna Žīgure i citi. Seikuoka informaceja bīdreibys sātys lopā www.lietussargs.lv
Tikai kūpā mes varam uzlobuot dzeivi Latvejā!
Jurs Viļums, vīns nu „Meierovica bīdreibys par progresivom puormaiņom” dybynuotuoju, jureits@jureits.lv, 26393531
