Latgalīšu volūdai starptautiski atzeits volūdys kods
2010.goda 18.janvarī par starptautiskuo standarta ISO639-3 uzturiešonu atbiļdeiguo instituceja “SIL International” (ASV) ir daškieruse latgalīšu volūdai sovu individualū kodu, kas sastuov nu treju burtu: LTG
Vēļ 2009.goda vosorā 7.julī tyka īsnīgts pīprasejums itaida koda sajimšonai. Pīprasejuma autors beja Juoņs Eisaks, kas sevi raksturoj kai “dulnu entuziastu-breivmuokslinīku”, bet reizī ari izsoka sovu redzīni par itaida koda daškieršonys nūzeimi: “Tys paver jaunys īspiejis latgalīšu volūdys lītuošonai modernuos informacejis tehnologejuos i padora īspiejamu latgalīšu volūdys atbolsta izstruodi biroja programaturai (pareizraksteibys puorbaude, sinonimu vuordineica i.c.), elektroniskīm vuiceibu leidzeklim itml. Guodojams, ka tys varātu atvīgluot latgalīšu literaruos volūdys tuoluokū standatizacejis procesu.”
J.Eisaka iniciativu tūlaik atbaļsteja Juris Cibuļs (Tīslītu ministrejis Vaļsts volūdys centrs), Ilga Šuplinska, Sanita Lazdiņa i Heiko F. Martens (visi Rēzeknes Augstškola), Juris Viļums (Dagdys nūvoda dūmes deputats) i Imants Slišāns (Latgalīšu volūdys, literaturys i kulturviesturis školuotuoju asociaceja). Ar pilnu pīprasejuma tekstu angļu volūdā var īsapazeit: ite.
Ziņa par itaida koda daškieršonu ir aktiviziejuse ari iz pasauļa popularys interneta enciklopedejis “Wikipedia.org” sekuotuojus – ir atsuokts dorbs pi ituo resursa izveides ari latgalīšu volūdā, da itam beja izstruoduota tikai parauga versija incubator.wikimedia.org.
Jūprūjom ir aktuals latgalīšu volūdys tuoluokais liktiņs. Jemūt vārā tryukumus Latvejis vaļsts lykumdūšonā, kai ari 8.decembra zynuotniskuos diskusejis “Latgales latviešu valoda Latvijas valodas politikas kontekstā”, kū reikova LU Latvīšu volūdys instituts, rezuļtatus LatBLUL (Latvejis Regionalūs i mozuok lītuotūs volūdu savīneiba) īrūsynoj izveiduot dorba grupu. Par primārim uzskotūt taidus vaicuojumus kai juridiskūs terminu preciziešona i dokumentu sagataviešona regionaluos volūdys statusa daškieršonys īspiejai; pasuokumu programys izstruode, kas ļautu suokt eistynuot Vaļsts volūdys lykuma 3.panta 4.apakšpunktā nūsaceitū: „Valsts nodrošina latgaliešu rakstu valodas kā vēsturiska latviešu valodas paveida saglabāšanu, aizsardzību un attīstību”; kai ari vajadzeigūs dokumentu sagataviešona i īsnīgšona izskateišonai atbiļdeigajuos institucejuos, kas uzdūtu vajadzeibu kotrā Latgolys školā vuiceit latgalīšu volūdu, literaturu i kulturviesturi.
Latgolys planavuošonys regiona atteisteibys padūme 2009.goda 18.decembra sēdē jau ir pījēmuse lāmumu i dorba grupā izvirziejuse Latgolys pašvaļdeibu puorstuovi Ināru Silicku (Kuorsovys nūvoda dūme). Ir sajimta ari atbiļde nu Tīslītu ministrejis, kas ir gotova sadarbeibai i dorba grupā izvyrza Māri Baltiņu, Vaļsts Volūdys centra direktoru. Tuoluokuo reiceiba teik gaideita nu Izgleiteibys i zynuotnis ministrejis.
Seikuoka informaceja:
Ilga Šuplinska, 26451355, ilga13@inbox.lv
Rēzeknis Augstškola