Vyss tai vīnkuoršai, sirsneigai…
![](https://lpr.gov.lv/wp-content/uploads/2007/lauds/1566.jpg)
Latgalīšu grupys ir pazeistamys na tikai Latgolā, bet ari citur Latvejā, pīvadumam, „Borowa MC”, „Bez PVN”, „Dabasu Durovys” itt. Bet ir dīzgon daudz grupu, kurys veļ nav īguvušus plašuoku popularitati, bet ir na mozuok viertiegys. Kai viertej latgalīšu muzyku, kaidys ir tagad īspiejis izapaust muzykā, vaicuoju Laurai Bicānei, daudzsūlūšai muzykantei i vysaidi cytaidi talanteigam cylvākam.
Mīlesteiba iz muzyku tev nuok nu saimis, bet kai roduos dūma nu muziciešonys šaurā lūkā tūmār puorīt iz plašuoku auditoreju?
Muzyka man pa eistam nuok nu bierneibys. Veļ tagad pruotā vuordi, kū bierneibā saceju mamai – saraksteišu dzīsmi. I tai pyrms 4 godim atsasādu i saraksteju dzīsmi ar nūsaukumu „Klusums”, taida vīnkuorša i liriska dzīsme. Tys suokums cīš saistāts arī ar faktu, kod īsavuiceju spieliet gitaru. Padūmovu, ka varu tak spieliet na tikai cytu sacarātys dzīsmes, bet juosuok arī pošai. Sok, nav kū turēt sveci zam pyura. Nu suokuma vuordus smieļūs nu dzejūlim, tod suoču poša sacerēt. Izviertejūt vysys dzīsmes, kū asmu sarakstiejuse, var redzēt dažaidys muzykys kruosys, atteisteibu.
Tu dzīd gon solo, gon grupā „Alverna”. Kai saīt bīžuok muzicēt?
Nu grupa tagad pastuov vairuok teoretiski nikai praktiski. Obys muosys vuicās Reigā, i tys ir golvonais īmasls, par kū namuzicejam kūpā. Kai arī interesis ir dīzgon dažaidys. Esmu mieginovuse spieliet arī ar draugim, bet kaut kas nav tai. Tys vyss pīdar pi munim radūšajim mekliejumim, kai lobuok itt. Bet pagaidam slīcūs uz solo.
Kaidu muzykys žanru tu puorstuov?
Naasmu specialists itymā ziņā, bet, kai soka muni draugi mūziki, tod tys vairuok ir folk, pop-folk.
Kod beja pyrmuo uzastuošona i kura vairuok palykuse atmiņā?
Pyrmajā „Muzykys Skrytulī” beju kai skateitoja, i tod nūliemu, ka nuokamajā juopīsadola. Tai nu sacerieju 2 dzīsmes, kai trešū izavieliejom tautys dzīsmi. Taišni „Muzykys Skrytuļam” izveidovom grupu. Tei beja taida pyrmuo uzastuošona. A vyslobuok atmiņā palykuse uzastuošona vīnā nu “LaLaDra” koncertim, kod saprotu, ka maņ nimoz nav baist, nav nikaida uztraukuma, ka doru tū, kas man pateik i saīt. Ļūti patyka uzastuot pasuokumā „Upeitis Uobeļdorzs”. Tī beja vyss tai vīnkuoršai, sirsneigai.
Kai tu viertei vysus itūs pasuokumus „Muzykys Skrytuļs”, „LaLaDra” itt.?
Tei ir lela īspieja jaunajim muzykantim. Piec „Muzykys Skrytuļa” daudzim mūzikim „Latgolys radeja” deve īspieju īraksteit dzīsmis, arī myusim. Tei ir īspieja tikt sadzierdātam. Pī tam itaidi pasuokumi vīnoj.
Latgola i latgaliskais – kū tev tys nūzeimej?
Varātu saceit, ka asmu Latgolys patriote. Lapna par tū, ka asmu nu Latgolys. I es par tū nasakauneju. Arī tod, ja aizrunoju sovā volūdā, kur it kai navajadzātu. Man pateik tys, ka latgalīšu volūda atsaškir dažuoduos vītuos, tys padora tū par vēļ savdabeiguoku i viertieguoku.
Tev ir dzīsmes gon latgalīšu, gon latvīšu volūdā. Kurā tev pošai vīgluok izapaust?
Man personeigi vīgluok ir latgalīšu volūdā. Tei ir muna volūda, tai es runoju sātā. Kod man ir īspieja cytur kur runuot latgaliski, tod es jiutūs kai sātā. Ir vairuok dzīsmu latgalīšu volūdā, tikai tuos veļ nav īraksteitys.
Voi ir vīgli byut jaunajam muzikim?
Vīgli nav deļ materialu apsvārumu. Ir vajadzeigi leidzekli, lai tyktu tuoļuok. Bet veļ svareiguoka ir motivaceja. Spieliet jau ir labi, bet juodūmoj, voi tys vyss „aizīs”. Vysleidz ir vajadzeigys arī gryuteibys, lai pīaugtu gorā. Ir labi, ka tuos ir, jū tikai caur gryuteibom ryuduos nūdūms, motivaceja.
Kaidi plani nuokūtnei?
Ceļt sauleitī sovys dzīsmes. Plani ir ļūti leli.
Nu tod atlīk nūvieliet veiksmis i izadūšonys. PAĻDIS!