Puorsoka par vucynu boru, kas nazkū gaideja…
Latveja, krīze, kas vaineigs, kas nūteik, kam tys vyss izdeveigi, aicynuojumi iz piketim i lyugšonom, kai byus iz prīšku… paraudzēsim iz tū vysu pazavērt prostuok:
Situaceja: vucynu bors, pīci goni, daži suni i vylku bareņš
- Vycynu bors. Gonās kur kurais, vysu laiku duovās i lomojās iz gonim, vylkim i sunim, kai ari vīns iz ūtra, ka nav kuorteibys. Laiku pa laikam sazalosa kūpeigai lyugšonai i tic, ka atīs kaids nu molys i savess kuorteibā jūs dzeivis. Juoatzeimej, ka vucyni bīži viņ poši nav pi tuo vaineigi, ka namuok atškirt vylku nu suņa, gudru gonu nu glupa. Laiku pa laikam kaids aizbāg prūjom iz lobuokom ganeibom;
- Pīci goni (eistineibā īcalti nu vucynu bora) vysmoz treis nu jim struodoj vylku lobā, deļ tuo teik pabaruoti nu jūs laupejuma pabyrom, visi publiskai sovā vydā sportejās (pa leluokai daļai tik deļ tuo, kab attaisnuotu vylku zīduojumus i sajauktu sunim golvys), reizi četrūs godūs meža molā spielej teatri, kab otkon tyktu par gonim;
- Klusī suni, kas raudzejuši kod na kod sadzeit vucynus kuorteigā borā, savaļdeit gonus i padzeit kaidu vylku, bet tys saucās „vīns navar nikuo padareit”, deļ tuo atmatuši cereibys. Kaids jau sarausteits gobolūs. Dažs jau sasadorboj ar vylkim, breižim vairs navar saprast – kurš eists suņs, a kurais nu meža izleids;
- Vylki dažaidu veidu. Leluokī sēd mežā i iz pļovu praktiski nazaruoda, kod na kod sazateik ar „sovejim” gonim. Dažim vylkim suok palikt garlaiceigi, tod tī valk vucyna uodu, kliust par īryndys „vucinim” voi attīceigi „gonim”. Voi ari, ka vucynu bors palīkn par daudz navoldams, tāloj gūdeigus suņus…
Rezuļtats: vucynu skaits naizbāgami sasamazynoj i navar konkurēt ar kaimiņu gonampulkim, kas pakuopeniski puorjem lobuokuos ganeibys…
Kas vaineigs? Vylki? Suni? Goni? Augstuoki pāki? Voi vysleidz poši vucyni?
Iz kū gaidam – kas varātu situaceji maineit?
a) Vylki pareis i liksīs mīrā.
b) Suni kod na viņ sazajims, padzeis vylkus, īskaidruos glupajim vucynim „kas pa kam” i īvess kuorteibu.
c) Gonus suoks mūceit sirdsbolss i jī nūjīs pi spovidis.
d) Glupī vucyni izdūmuos, kai izdareit tai, kab vysmoz treis goni nu pīcim struodoj na vylku, bet gon bora kūpeigūs interešu lobā.
Naasu ni vylks, ni suņs, ni gons. Taitod – juoatzeist – paglups…