“Mōras zeme” roksta…
Pīduovojam ari laikroksta “Rēzeknes Vēstis” pīlykuma “Mōras zeme” informaceji. Itymā reizē kristeigais pasauļs teik aicynuots atbaļstēt “Latgolys Radeji”. Otkon.
LATGOLAS RADEJA PALEIDZĒS IZDZEIVŌT
Kai gaismas stors palākajā ikdīnā, kai paleidzeiga rūka, kai vīneigais glōbīņs un cereibas stors daudzōs katōļu mōjōs jau ūtru mēnesi skaņ Latgolas radeja un teik ar lelu napacīteibu gaideiti svātī breiži un lyugšonas kūpā ar prīsterim voi ar pošu veiskupu Viņa Ekselenci J. Buli, kurs, lyugšonas beidzūt, dūd sovu svēteibu.
Itī breiži īdvesmoj, līk sajust, ka tu naesi vīns un aizmērsts, ka ir vēļ kaids, kurs tymā pošā laikā kūpā ar tevi lyudzās na tikai pi radio mikrofona, bet ari kaimiņu sātā, cīmā, vysā nūvodā, cytōs piļsātōs: Bolvūs, Ilūkstē, Viļānūs, Varakļanūs voi Jēkabpilī. Tys dūd gora spāku, dzeivōtgrybu, līk prīcōtīs, ticēt, cerēt…
Un cylvāki zvona nu molu molom, lai pasaceitu paļdis tagadejam radio saiminīkam, Bazneicai un Rēzeknes – Aglyunas veiskupejas vadeitōjam V. E. Jōņam Buļam.
Nu jau acim radzams, ka Bazneicas mērkis saglobōt leidzšinejū latgaliskū skanējumu, uzrunōt klauseitōjus dzymtajā volūdā un veidōt dialogu kristeigā gorā tiks sasnāgts, ka Latgolas radeja paleidzēs tautai izdzeivōt. Ar vīnu nūsacejumu — ja izdzeivōs poša. Bet izdzeivōt šūbreid var, vīneigi cerūt uz zīdōjumim un reklamdevējim.
Kai pastōsteja Vīņa Ekselence veiskups J. Bulis, 99 procenti nu SIA “MG Latgolas Bolss” īpašuma daļom sajemtas kai dōvona. Dīvamžāļ ar lelym porōdim. Un radio uzturēšonai tēreni sanōk lely: Latvijas Radio un televizijas centram par tūrņu izmontōšonu, par raideitōju tehniskū apkūpi un remontu napīcīšami tyukstūši, vēļ saimnīciskī izdavumi — olgas, elektreiba utt. Nav jōaizmērst, ka Katōļu Bazneica nav peļņas organizaceja. Tai ar sovim zīdojumim paleidz izdzeivōt vīneigi ticegō tauta un tureigī labvēli, uz kurim vyslelōkō cereiba.
Ja jyusim ir svareiga Latgolas radio pastōvēšona, sovu zīdōjumu varot pōrskaiteit uz kontu
SIA “MG LATGOLAS BOLSS”
Reģ. Nr. 41503036674
Latgales iela 82, Rēzekne, LV-4601
SEB Banka
Bankas kods: UNLALV2X
Konta Nr.:
LV67UNLA0050014457010
Daudzi vaicoj: “Kur palyka tei nauda, kū mes šūvosor jau zīdōjam radejas glōbšonai pēc bīdreibas “LR” aicynōjuma?”
Dīvamžāļ Latgolas radejas reiceibā tei nav nūnōkuse.
REKLAMU LATGOLAS RADEJAI voi APSVEIKUMU raidejumam “Soldonō stuņde”, kas skaņ nu pyrmūdīnes leidz pīktdīnei laikā nu 13.33 leidz 14.00, var pīteikt pa tel. 64607570, 22185306.
