Cik sovaids rudiņs
Agri nu reita as izguoju šudiņ,
Daugova lelūs lūkus kur mat –
Siereiga mozuo Latgola muna
Upis molā pi olūta sēd…
Nadzierd vairs laksteigolu dzīsmes,
Tikai zeileites cincinoj vēļ –
Sludynoj zīmu tik borgu, ka brīsmas!
Seidzynoj skudreņas mitekli ceļt.
Pasmeļu rīkšovā breinumu soltū –
Olūta yudiņs kai osora teirs.
Dreiži saule puor bierzeņim boltim,
Reitausmas prīveiti atraiseit steigs…
Dzaltonuos lopas bez gaismeņas jyutu,
Cārmyušku guni pat navajag.
Līkās – vacais Varslavāns byutu
Izkruosuos rudini, šudiņ kas dag…
Brodoj ūzuls pa byrušom zeilem,
Kļovam ķieneņa krūņs zemē rauts…
Kruošņuos drēbes plāstas pa veilem,
Niule tikai palākums ļauts.
Tai i myusim, kai vīsuļa guoztim,
Zīmu gaidūt niu juosaleikst.
Poši atruovem Rītumim vuortus,
Godim kruotais niu juoaizmierst…
Vīneigi doba pi pruota vēļ turīs –
Izdzeivuošonai dareits teik vyss.
Myusim atlīk vīn poruodu kulis –
Ceļš na cytur, iz Golgātu īs…
Ruodīs – pageibuši ir spāki,
Rozā sapyny beigušīs jau…
Moksuosim ilgi par cytu grākim,
Atjamūt vysu, kam nikuo nav…
21.10.2009
