Jaunuokais video klips nu Borowa MC – Bez Tevis
“Klipa Bez Tevis filmeišona beja aizraujūšs process, deļ tuo ar grupys dalinīkim izbaudejom ekstremys šaļtis, traucūtīs ar bezceļa auto pa mežim, karjerim, upem. Maņ teišom beja prīca sasastruoduot ar režisoru Jurģi Tūbeli i operatoru Kasparu Braķi,” atsazeist grupys līders Aigars Runčis. “Kod pīkrytu pīsadaleit filmā Pasažieri šofera lūmā, šaubejūs, ci darieju pareizi, nu izmieginuot spākus kino atzarē asu sapņuojs nu bārna kuojis. I tik daudzi kilometru, cik beja vādzeigs filmeišonys laikā, nūriņķuot džipā pa Reigys ūkom ari nav jūka dorbs.”
Dzīsmis Bez Tevis muzykys autore ir Guntra Kuzmina, bet teksta autors Aigars Runčis. Pyrmatskaņuojums beja Aigara dzimšonys dīnā 17. augustā. Dzīsme Bez Tevis ir stuosts par pīsakeršonūs i suopeigu škieršanūs. Kod cylvākim ir spilgtā pīminē laimeiguos šaļtis kūpā ar ūtru cylvāku, kod jis vēļ ilgojuos piec tik īrostajim gluostim, sumynim i meilajim vuordim i kod kotrā preteimā guojejā ir gotovs saskateit meiļuotū, nasaverūt, ka tī ir tik cyti cylvāki i cytys attīceibys.
Dzīsme Radio SWH TOP 20 ūtrajā nedeļā izkuope par 13 vītom i par reizi īgiva 1. vītu, kur nūsaturēja div nedelis. Klipa Bez Tevis režisors ir Jurģis Tūbelis i operators – Kaspars Braķis. Dzīsme byus dzierdama izskaņā jaunizjimtajai latvīšu pilmetražys filmai Pasažieri, kurys prīškā stateišona ir gaidoma leidz ituo goda beigom.
Filma Pasažieri (režisors Jurģis Tūbelis) ir par cylvāku attīceibom, kod vyss rit sovu gaitu. Par tū, ka nagaideiti pagrīzīni ci cylvāki, kas pasagoda ceļā, var ituos attīceibys izmaineit. Tuos ir atkluosmis šaļtis, kod cylvāks nūviertej, kas eisteneibā jam pīdar. Filmys sižets sasasaucuos ar dzīsmis Bez Tevis byuteibu.