Sveceite
Tī Palaidas molā,
Kur leluo prīde
Ar symtgodu līpu
Volūdys vad,
Aiz plideru žūga
Pi krysta kūka
Kaids ikvokorus
Sveceiti dadz…
Nu reita agra
Ūļneica pylna
Bārnu bolsim
Iz školu kas īt.
Gar krystu eimūt
Tī capuris cyloj,
Krystu puormat
Pyrms tuoļuok skrīt…
Tai bierneibys godi
Gar Jaulejas molu,
Puor Muolejkolnu
Iz Bykovu īt…
Tai jauneiba aizskrīn,
Tik vacajā prīdē
Otkon žuguris
Pereklī…
Vīn tulznainuos rūkas,
Kas gluostieja mani
Tī palyka,
Gluosta jau myužeibu.
Reiz sveceiti īdadzūt
Vokorā vālā,
Tuos deve man dzeivei
Svieteibu…
Tī Palaidas molā
Vēl leluo prīde
Ar simtgodu calmu
Volūduot grib…
Ni krysta kūka,
Ni plideru žūga,
Vīn ruodīs –
Vokorūs līsmeņa zib…