Marijai Andžānei – 100
![](https://lpr.gov.lv/wp-content/uploads/2009/nutykumi/1925.jpg)
Vysa pyrms svātuo mise Ladskaronys bazneicā, tod pīminis breids M. Andžānis dzymtajā Maču solā, a tod Šķaunis Tautys nomā Latgolys dzejnīku (Ontons Slišāns, Anna Rancāne, Raibīs Suņs, Līga Rundāne, Anita Mileika, Meldra Gailāne, Einars Derviniks, Mārīte Slišāne, Jurs Viļums) prīšklasejumi, kai ari Sovvaļnīka muzykys albuma „Sūpluok”prezentaceja (dzīsmem izmontuoti ari M. Andžānis teksti). Vysa beiguos kotrs varēja īsapazeit ar bibliotekā atjaunuotū i papyldynuotū ekspoziceji, kas veļteita dzejneicai.
Skaisti ir īīt
Cyta dvēselis duorzā,
Īkūptā,
Sazīdynuotā. M.Andžāne
Ar itīm dzejneicys vuordim, kas montuoti ari Sovvaļnīka muzykys diskā “Sūpluok”, paguoja saulainais sastdinis pasuokums. Prīks, ka kluot beja ari M. Andžānis radinīki, kas pasuokuma daleibnīkim na tik viņ stuosteja spylgtuokuos atminis, bet pogostā atteistamajam muzeja projektam duovynuoja Andžānu dzymtys kūku, kura saknis meklejamys jau 18. godu symtā. Taipoš M. Andžānis bruoļa meitys uzduovynuoja drukojamū mašynu, kas bejs naaizstuojams ikdīnys lītuojuma prīkšmats rakstnīku M. Andžānis i K. Stroda-Plencinīka saimē.
Marejis Andžānis simtgadei par gūdu ir izdūts logo uzleimis formā, kū varāja sajemt kai pasuokuma daleibnīki, tai kotrs, kas pabyus Šķaunis bibliotekā i īpazeis izcyluos nūvodneicys darbeigū myužu. Lai ari logo veiduošonā varie pīsadaleit ikkotrs jaunīts vacumā leidz 25 godim, atsauceiba nabeja tik lela, partū logo pamatā ir muokslinīka Andra Džiguna skice M. Andžānis dzejūļu kruojumam „Dimensiju kvadrātsaknes” (1999). Tyka papyldynuots ari video materiālu kruojums par M. Andžāni. Pasateicūt Rēzeknis Augstškolys videospecialistam M. Justam, scenareja veiduotuojai I. Šuplinskai, šķaunīši i Šķaunis gosti bibliotekā varēs ari nūsavērt diskā „Sūpluok” asūšū prezentaceju „Izejis punkts”, kai ari vērtīs pasuokuma „Marijai Andžānei 90” īrokstu.
Pasuokumu organizeja Šķaunis pogosta biblioteka sadarbeibā ar Rēzeknis Augstškolu. Atbaļsteja: Dagdys nūvoda dūme, Latgolys regiona atteisteibys agentura i Šķaunis pogosta puorvaļde.
Ituo goda oktobrī paradzāta ūtrei storptautiskuo latgalistikys konfereņce „Centrs i perifereja: perspektivu maiņa”, kas ari byus veļteita M. Andžānis simtgadis atcerei. Konfereņcē tiks aktualizāta centra un periferejis izpratne mozajuos i regionalajuos volūduos, folklorā, literaturā, ar tū saisteitī procesi sabīdreibā, izgleiteibā, politikā: regionalisms, lokalais i globalais aspekts, decentralizaceja, identitate, multikulturalisms. Pasuokuma ītvorūs ari uorzemu gostim i rēzeknīšim tiks pīduovuots īsavērt Sovvaļnīka diska muzykys i video materiala lappusēs. Bet Rēzeknis jaunīšim jau 24. septembrī Latgolys Kulturisviesturis muzejā byus īspieja pīsadalēt Dzejis stuņdē, kurā ari tyks gūdynuota M. Andžāne.
Vairuok informacejis:
Ilga Šuplinska,
Rēzeknis Augstškola,
ilga.suplinska@ru.lv
Informaceji sagataveja:
Juris Viļums
Dagdys nūvoda Sabīdrikūs attīceibu i komunikaceju dalis vadeituojs
juris.vilums@dagda.lv, 26393531