Sūplokums
Laiku laikūs tai ir bejs i šūbreid ir; ka vīņs audzej vādaru, a ūtrys – pruotu, ka vīņs audzej saimi, a ūtrys – naudys moku… I itū vysu var dareit goņ ar sovu dorbu, goņ ar ūtra dorbu, goņ īnūt taisnū celi, goņ – leikumojūt.Soka – juoapkaroj korupceja. A itej korupceja, prostuok izasokūt – blokusattīceibys voi sābruošonuos, a vieļ precizuok – sūplokums ir pastateits nu poša Dīva.
Ka Īvai ar Odumu nabyutu izaveidovušīs blokusattīceibys voi sūplokums naatļautuo uobūla iesšonā, voi vyspuor iz pasauļa dzeivuotu ļauds?
Sūplokums ir loba dela! Tu zyni, ka vari pasaļaut, jo asi bejs na viņ taisnajuos a i blokusaattīceibuos. Tys tai pat kai tanīs slapynajuos organizacejuos, kur bīdri vīns ūtra atbolstu aplīcynoj na viņ ar vuordu, a i ar sovu asni.
Nu, kaida valna piec kas man paleidzeis, ka as lyugšu izdūt sovu gruomotu? Kurs to itaidā muldeišonā īguļdeis sovu naudu? A, ka as byušu muldeidams kū na viņ lobu pasaciejs par kū to na viņ, verīs, da verīs, jov i munai gruomotai atlieks kaids tyukstūžeits …
Navar dzeivē taišni viņ īt. Braucamais ceļs, ka namat leikumu, i tys palīk nainteresants i nūgūrdynūšs. A cylvāku sadzeive tai i prosuos piec sūplokuma; lai byutu kū sliept, kū aprunuot, lai byutu par kū tryukuotīs, par kū byut aplaimuotam, lai byutu ar kū i vādaru audzeit i naudys moku, lai byutu sovam pruotam i saimis dūmai …
Dieļ kuo ogruok cīmā beja vīna pierts? Na jov nu nabadzeibys voj slynkuma. Prosta, ka vysi cīma veči voi buobys saguoja piertē i vieries vīns ūtra keilumūs, to nabeja kū i kur nūslept. Pierts beja kai – na to mīsys viņ, a golvonūkuort – dvieselis sūplokums. A pādejūs kolkozu godūs – sūmu piertis ar partejis komiteju i ministreju dūžu cīneišonu i sutynuošonun iz luovys? Kas to tys nabeja sūplokums?
A dieļ kuo šūbreid ESa, SVF, NATO i vieļ cytu ītekmeigu veidojumu kungus i dāmys navar pasutynuot kaidā Latgolys Malnajā piertē pi Rāznys azara, a voi kod Viļakys nūvoda Tepeneicā? Iz reizis dzymtu sūplokuma jyutys, voi blokusattīceibu sapratne, voi myužeiguo korupceja, kas ļautu prezidentīm i ministrīm, deputatīm i komisarīm, a par omotīm sīvīšu dzimtē i narunuosim vyspuor, saspīst viedereņus kūpā, kūpejū svīdru litreiti nūskoluot ar šmakovcenis ķipeiti, nu korstuma saceļt pādejū kyuseiša spaļveni stuovus – i nabyutu juobādoj, ka Latvejā nav politiski i saimistiski gudru pruotu pi varys.
Kai to beja komunistu laikūs? Kūpā pasveida, kūpā pasamaukova, kūpa pokmeleiti paluopeja – i vareja par Latveju nadūmuot, Moskovai jov vyss beja izlamts.
Nu tok, cik to iļgi mauksim uodu puor acīm prostajai tautai? Kas – to nav tī poši viezeiši tymuos vaļsts vadeibys kuleities? Natālojit svātūs i nasaucit tautu, kai nu Strenču slimineicys izlaistūs, iz nazkaidu skrīšonu, iz nazkaidu vuokškeišonu, iz nazkaidu atsamineišonu … Vāg struoduot! Struoduot vāg i sūplokumā!
Gona audzeit vādarus i naudys mokus! Gona! Kurynojit piertis i tacynojit šmakovceņu – i taisit sūplokumu ar tīm, kas jyusus par kungīm padareja i turpynoj taidus padareit, a nu tautys naprosit sūplokuma. Tautai juoaudzej pruots i saime, tautai juostaigoj taisnī ceļi, jo tautai nav ņi cītumu atslāgu, ņi osoru gāzis mašinu …lai jyusu – vaļsti pi sabrukuma davadūšūs ībīdynuotu …