Preiļūs turpynojās seminars Latgolys jaunīšim „Atzolys”
![](https://lpr.gov.lv/wp-content/uploads/2009/atzolys-2009/1844.jpg)
Seminars „Atzolys” teik reikuots kotru vosoru jau nu 2004. goda, itūs godu laikā jimā ir pīsadalejuši vairuoki symti jaunīšu nu Latvejis i cytu vaļstu, tymā skaitā vairuoku itūšaļt popularu latgalīšu muzykys grupu daleibnīki, jaunī autori i sabīdriski aktivi jaunīši, kas taišni „Atzoluos” ir īgivuši pamudynuojumu vāluokajai rodūšajai darbeibai i daleibai navaļstiskajuos organizacejuos. Lela daļa nu atzolīšu ari iz prīšku ir saglobuojuši interesi par latgaliskū i saitis ar Latgolu. Ituo goda „Atzolys” pyrmū godu organizej bejušī atzolīši – jaunī studenti, „Latgolys Studentu centra” bīdri.
Seminara aizdavums ir īpazeistynuot jaunīšus ar Latgolys nūvoda viesturi i kulturu, paleidzēt apsazynuot juos sovpateibys, īsavuiceit byut lapnam par sovom saknem i pīdereibu, taidā veidā veicynojūt jaunuos paaudzis interesi par Latgolu i latgaliskū, par nūvoda paguotni, šudiņdīnu i atteisteibu iz prīšku.
Itūgod seminara laikā teik organizātys vuiceibu lekcejis par vysaidom ar Latgolys kulturviesturiskū mantuojumu, šudiņdīnu i nuokūtni saisteitom temom, pīmāram, par Latgolys literaturu, latgalīšu rokstu volūdu, prezentaceju veiduošonu. Teik taiseitys interešu grupys i diskusejis, nūteik ekskurseja pa Preilim, natradicionaluos sporta spēlis. Vokorūs daleibnīki pīsadola teatralūs i muzykalūs prīšknasumūs. „Atzolu” laikā teik apgiutys latgalīšu dzīsmis, tradicionalī daņči i latgalīšu rokstu volūda, taiseita „Atzolu Avīze”.
Seminara dorba volūdys ir latgalīšu i latvīšu. Latgaliski nūteik lekcejis, praktiskuos nūdarbeibys i izklaidis pasuokumi.
Seminaru organizej bīdreiba „Latgolys Studentu centrs”, tai pyldūt sovu aizdavumu – veicynuot jaunīšu īsasaistiešonu Latgolys nūvoda kulturvidis, ekonomiskuos i socialuos vidis atteisteibā, koordinēt ar tū saisteitūs projektu izstruodi i realiziešonu. Bīdreiba sadarbeibā cytom navaļstiskajom organizacejom, vaļsts īstuodem i pošvaļdeibom ir organiziejuse muzykys festivalus „Muzykys Skrytuļs”, „Taiseits Latgolā”, školuotuoju vosorys kursus „Vosoruošona”, zīmys omotu školu jaunīšim i latgalīšu rokstu volūdys kursus, izdavuse dzejis antologeju „Susātivs” i c. Bīdreibys 2009. goda darbeibys programu atbolsta Islande, Lihtenšteina i Norvegeja EEZ finanšu instrumenta i Norvegejis finanšu instrumenta ītvorūs i Latvejis vaļsts ar Sabīdreibys integracejis fonda storpnīceibu. Bīdreibai ir sabīdriskuo lobuma organizacejis statuss.
Seminara „Atzolys” nūtikšonu atbolsta Vaļsts Kulturkapitala fonds. Paļdis SIA „Salang-P” vadeibai i personalam par atsauceibu i kancelejis precem, Preiļu Vaļsts gimnazejis folklorys kūpai „Rūtoj” par ļusteigim daņčim i skaneigom dzīsmem!
![](https://lpr.gov.lv/wp-content/uploads/2009/atzolys-2009/1845.jpg)
Linda Orole,
Seminara vadeituoja,
bīdreibys „Latgolys Studentu centrs” vaļdis lūcekle
Mob. t. 26389380, e-posts linda_orole@yahoo.com
LgSC sātyslopa: www.lakuga.lv/lg/lgsc
LgSC dīnroksts: skreine.wordpress.com