Izdūts Sovvaļnīka debijis disks “Supluok”
Esi „sūpluok” vosorai!1. julī pi klauseituojim nuocs Sovvaļnīka debijis disks „Sūpluok”, kas atsaškir nu puorejim na tik vīn ar originalim i spieceigim dzejis tekstim i tūs muzykalū rysynuojumu, bet ari ar tū, ka tys ir pyrmais disks Latvejā, kurā var atrast ari video stuostus par muzykys tekstu autorim.
1. julī Rakstnīceibys, teatra i muokslys muzeja Bārnu ustobā beja saguojuši Sovvaļnīka draugi i dorbabīdri, plaši puorstuovūt filologu saimi. Zeimeigs datums – 1. juļs kai rūbeža jaunīvālātojom vaļdeibom, godam, kas zyn, varbyut ari jaunai tradicejai. Vēļ kaidu laiceni atpakaļ 1. juļs saistejuos ar Imantdīnom i intelektualuos muzykys pasuokumim koč kur Vidzemē, piec Sovvaļnīka diska izīšonys var izteikt provocejūšu dūmu par tū, ka ari Latgolā var buyt sovys, pījemsim, Ingardīnys. Tymā pošā laikā, tik citā vītā i cytā muzykys amplitudā.
Prezentacejis dalibnīki varāja na tik viņ baudēt akustyskuos gitarys spieli autora i juo drauga Jaroslava izpiļdejumā, vērtīs videostuostus, bet ari pavaicuot pošam projekta autoram vysu, kū sirds kāroj zynuot. Saruna izaraiseja par tuoluokajim plānim, dzejis i muzykys kūpsakareibom. Kaids klauseituojs gribēja puorsalīcynuot, voi Valentina Lukaševiča teksti tik tīšom ir tik muzykali, ka tī dominej diskā. Kaids cyts raudzeja nūskaidruot Sovvaļnīka izceļsmi, valkūt asociacejis – Sedmenc- Sovvaļnīks-SS?! Kotrs tod varāja ari puordūmuot sovys viesturis zynuošonys voi ari pīduovuot kaidu sovu rysynuojumu itai labi zynomai abreviaturai, tok Sovvaļnīks puorlīcynuoja, ka kūpsokors tī nav meklejams. Sanuokušī varāja ari puorbaudeit sovys skaitietprasmis latgaliski, juoatzeist, ka rezultats beja breineigs. Pat taidi, kas atsarunuoja, ka skaitēt naprūt, saglobova kai intonaceju, tai volūdys plyustameibu. Lobi vuordi, pučis, pateikamys emocejis i sirsneigys sarunys. Ka nabejot kluot, tod – meklejit veikalūs jaunū Sovvaļnīka disku „Sūpluok” interneta veikalā MadeInLatgola.LV , Depo. K-Rauta u.c. veikalūs voi ari gaidit prezentaceju Šķaunē (Kruoslovys rajons) 12. septembrī voi ari Rēzeknē 16. oktobrī.
Vēļ tik atguodynuojumam – diskā „Sūpluok” ir 10 latgalīšu dzejnīku (V. Lukaševičs, L. Rundāne, O. Seiksts, M. Andžāne) teksti ar Sovvaļnīka muzyku, kai ari 4 videostuosti par autorim i jūs vydabolsu. Paļdis vysim, kas atbaļsteja diska izīšonu, bet par finansialū atbolstu juosaka pateiceibys vuordi – Latgolys regiona atteisteibys agenturai, uzjiemiejam A. Linužam, S. Gorsvāna zīduojumam i RA Filologejis katedrai.
Sūpluokuma sajiutu itamā pasoltajā vosorā!
