Jaunys īspiejis latgalīšu informacejai
![](https://lpr.gov.lv/wp-content/uploads/2007/lauds/538.jpg)
Pasauļa informacejis telpa palīkn aizvīn pībuoztuoka ar vysaida veida informacejis tehnologeju īspiejom: e-posti, sātys lopys, portali, dīnroksti (blogi)… Nazkod beja dzierdāts, bet nu jau ari pats asu klivs par vēļ vīnys sistemys lītuotuoju – twitter.com
Tys ir sova veida masu medijs i savdabeigs informacejis olūts, kur nav nivīna redaktora, kur nav informacejis fiļtriešonys i laikam ari cenziešonys sistemys. Bet ir individuali informacejis nesieji – privatpersonys voi ari kaidys organizacejis, kas eisu „seikšaļteņu” veidā (kotra nu tom nav leluoka par 140 drukuotu zeimu garumu) stuosta sovys ituo momenta sajiutys, pasadola ar pamaneitajim dūmugraudim, īsoka kaidu saiti cytā portalā, kuru byutu vārts redzēt, pīvīnoj ituo breiža fotokarteni… I tikai Tu pats izlem, kurim informacejis olūtim Tu gribi sekuot i tai veidojās Tova informacejis upe, kas satak nu mozenim cytu ļaužu raksteitim olūtenim…
Izavieļēt var vysdažaiduokūs informacejis deviejus: privatpersonys, politiki, atseviški TV raidejumi, daži laikroksti snādz ari aktualitatis nu sovys puses… Kai izaruoda, itymā pasauļa leimiņa sazinis leidzeklī jau ir ari vairuoki latgalīši – daži nu jīm tik laiku pa laikam īroksta kū na viņ latgalisku i ar Latgolu saisteitu, bet citi tū dora dīzgon bīžai. Ka ir interese, tod vari ari Tu apsavērt, kū jaunuoku šudiņ dūmoj, skaita, roksta:
LaKuGa.LV raudzeis nūskaidruot tehniskuos niansis i pīduovuot kaidā myusu portala styurī „on-line” režimā aktualitatis nu latgalīšu aktivitatem informacejis sistemā twitter.com
Juoatzeimej, ka ari kotrs nu Jiusu var kliut par itaidu latgalisku dūmu i pīzeimju raksteituoji.
Atguodynuošu, ka varit ari veiduot sovu dīnrokstu/lopu leluokajā latgalīšu sazinis interneta leidzeklī: Latgalīšu Kuļturys Gazetā – LaKuGa.LV
Tehniskuos īspiejis ir dažaidys i varam pīsalāguot Jiusu interesem – golvonais pīrokst iz lakuga@latgale.lv i tod vysu sarunuosim!
Lai Jiusim lobys breivdīnys!