Karūgu laiks

Pasavieru iz jaunuo Dīnys formata, iz čudnūs spama blogu i politiskūs vuordu okeanu i nasaprotu, voi maņ tuo vajag. Šaļtim jau ruodīs – rakstiešona latgaliski publiskā telpā ir taids pats sektantisms kai sovys partejis cyldynuošona voi cytys partejis aplikšona. Nu ūtrys pusis, maņ tok nikuo navajag. Ļaunit tik maņ byut. A byut poša es varu tikai latgaliski.

Pavasars. Karūgu laiks. Guojīņu, piketu, demonstraceju, praidu, saīšonu, svietiešonu, pikniku sezona.

Prīškā vysi maja svātki – 1., 4., 8., 9., 15….. Pat narcizis i krokusi izšaun sovus karūgus nu zemis – redz, mes tože. I pāvi volkojās ar sovom astem – mes ite, ite, ite. Kryumūs sasaplieš zvierbuli – ite, ite.

Niule tik ruņči taidi nūguruši. Volkojās pyrmajā pavasara korstumā kai Dīva napījimti, astis aplaiduši. Cyts guļ jaunajā zuoleitē, cyts izalaids iz betona. Kaču laiks ar marta vieksšonu ir cauri.

Cyts kačs lyzgojās saulē, pucej sovu kažuku. Cyts apsalaids, vyss palāks, nateirs. Pasaver ar nūgurušom īlys kača acim, ocu kakteņūs strutys. I saprūti – piļsāta nav ni deļ cylvāka, ni kustūņa.

Šudiņ bulvarī pi stacejis redzieju, ka Reigā salykti karūgi vysuos moluos. Plaukstūšūs kūku lopu zaļais saulē až vibrej, gryutais ašņa sorkonais Latvejis karūgūs saulē atspeid i palīk koč drusku caurspeideigs.

Niu laikam myusus vuicēs byut latvīšim. Karūdzeni vysuos moluos. Patriotiski.

Novembrī sorkonboltsorkonais īsader cytaiž – palāki dryums fons i sareciejušuo ašņa tymsi sorkonais kai upers, zīduojums, cereiba. Gryuši sorkonais i rudiņa laika palākais – puordzeivuosim, puorlaissim, pasaceļsim.

Pavasarī sorkonboltdorkonajam izaceļ boltuo streipe – cereiba, ticeiba, mugurkauls. Palāks apvozuots voi snīga boltumā.

Tai jau ir ar tom sirdsapziņom. Kod klusej, a kod viekš. A kod vīnkuorši saprūti, ka jau nateira, apvolkuota.

Par cylvāku napīdzymst. Palikt par cylvāku ir gryuts dorbs – i uperejūt daudz kū i lejūt tū tymsi sorkonū, i saglobojūt sovu kūdulu. Tū boltū.

A cytaiž vyss pa vacam. Karūgi plivinej viejā – to sorkonboltsorkonī, to oranži streipuotuos Svātuo Jura būrteitis pi taksistu antenu, to geju varaveiksnis, to sorkonī karūgi Uzvarys parkā, to benzintanku i lelūs veikalu reklamys karūgi boltūs mastūs.

Pierc šudiņ, moksoj reit. Moksoj par vysu, kas beja i kas byus. Vairumā atlaide – taida i itaida kruosai.