Kai izuorsteit Latvejis mugorkauļa suopi?
Cik as zynu, ka tymūs naseņejūs, lai goņ i paseņejūs, laikūs, kod tautys medicina vieļ beja golvonais uorsts latgalīšīm, beja pavysam sovaida uorsteišona. Vacūs tāvu, kai tūlaik saceja – vaciņu mugorys sastīpumus voi cytaidys mugorys kaitis uorsteja unuki vacumā, kod jī nu ruopuošonys puorīt iz staiguošonu. Vaciņs ar suopūšū mugoru tyka nūguldynuots iz zemis i jam pa viersu tyka palaists unuku bors, kuri ruopova i laksteja pa vacina mugoru, vuordu sokūt – meideja vacini ar kuojuom.Voi šūbreid myusu laikūs, kod Latveja palykusi bez mugorkauļa, pareizuok – sovu mugorkauli ir savādejusi klaneidamuos vysaidu naudyskuļu tureituoju prīškuos i pakaļuos, navādzātu atsagrīzt pi tautys medicinys?
Nu, tok, dereitu gon Latveju nūguozt pi zemis in pameideit ar kuojuom … As te narunoju par Latveju, kai teritoreju. As te runoju par Latveju, saprūtūt Latvejis vodūšūs politikaņus i vodūšūs parlamentarīšus ar sovu īcaltū Latvejis vaļdeibu.
Cik iļgi myusu „vaciņs” dzeivuos ar škeibū i leikū mugorkauli? Cik iļgi myusu „vaciņs”- myusu Latveja cīss ituos suopis, kod pamattauta bāg nu dzimtinis paceli, kod pamattauta teik apkryudeita vieļ vairuok nakai bezdzimtinis laimis mekleituoji, kod latgaliskais tautys calms teik apkākuots nu kotra, kuram viņ slynkums nūstaiguot da atejis?
As nazynu. Nu, grybātūs, o, kai grybātūs, ka myusu Latvejis „unuki” suoktu uorsteit sovu vaceiti Latvejeni tai patīsi eisti, pa tautyskam …
Mož tūlaik kas to viņ pasadūs iz lobuoku dzeivi! Redzīs, o, kai redzīs, ka pasauļa globaluo medicina na uorstej, a nūuorstej myusu varys turātoju pruotus, tai poš kai mugorus. Nūuorstej iz nalobumu, a na izuorstej iz lobumu …
Palītuosim tautys medicinu vairuok! Palītuosum!
Petru Pīters
