DZEJA 2/ Ina Vanadziņa

Sprikstis

Nūjauču uz lada.
Apdauzēju vairuok sirdi
Nakai cytu vītu.
Pēc īspraudu zemē mītu,
Lai cytu reizi
Byutu pi kuo pīzaturēt
(Ka tik dzeivē
Vajadzētu vīn mītus,
Lai napakrystu).

********************************
Gaisā jiut pavasari-
Tu soki?
Veitulā vierbys
Grūza opolas acis,
Cylvāks nu ofisa
Uorā lein-
Gona smirst!
Juoīvalk nuosīs
Pavasara smarža,
Juoīraun mutī
Bārzsulu garša!

*******************************
Kači palykuši troki-
Nav vairs mīra
Ni dīnu, ni nakti.
Hormoni, hormoni…
Trokoj ik pavasari.
Redzi, pat slūtai
Sazacāluši sari!

********************************
Ko tu ar dagunu
Muokūņus stumdi?
Dūmoj, ka tai
Pyrmīs sagaidēsi
Pavasarstundi?

• Nā, – tu soki,
• Mekleju muokūņūs tū,

Kū rudinī pazaudēju.
Nav. Laikam pi cyta
Aizpeldēja…

********************************
Kū dora mozs ezeits
Vokorā zylā
Uzkuops uz akmiņa pļovā?

• Ko breinojīs?

Jis man prosa,

• Acs izbirzs nu pīres,
• Gaidu, kod atliduos svīres.

Tai i nasaprotu,
Kam ezeišam svīres?
Laikam zyls pavasars
Sakuopis golvā,
Ežam tok odotas,
Putynim – spolva…

*******************************
Atnes man
Kofeja krūzī vyzbuļus.
Saspraud man motūs
Pūkainūs pyupolus!

Tu skotīs uz mani
Ar breinumu,
Nasaprūti voi nagribi saprast,
Kū runoju…

Tai jau irā-
Runoj pa taisnū-
Nasaprūt,
Juodora pa vacam:
Juosoka caur pučem…

*******************************

Pasauli apjaust nu jauna

Sirds,
Īkolta akminī,
Raud.
Voi jimt lauzni
Voi kailom rūkom
Jū nu akmins sprūsta
Ūorā raut?

Kai lai jū trauslu
Un maigu
Ar lauzni
Nu akmins cītuma
Uorā raunu?
Ja nu īvainoju,
Kai lai padoru
Spraunu?

Ar kailom rūkom
Akmins šķembas
Salauzt spēju,
Tik osoras…
Osoras ryugtas
Sastynga vējā…

Tys nikas,
Ka sapņus aplaužu
Ap osuom
Akmiņa šķautnem,
Tūtīs sirds-
Breiva un laimeiga,
Suoka pasauli
Apjaust… un mīlēt…

… Nu jauna…