Džylynuotoji

Iz taidīm, kas struodoj ar naasynuotīm, naražeigīm zuodžīm voi nāžīm, ļauds soka: „ Džylynoj …” Saprūtit poši, ka tī nasaīt ņikaida grīzšona voi zuodžeišona. Viņ laika provesšona, nu – džylynuošona, a na struoduošona.

Maņ tādiņ izalīk, ka vysus myusu vaļsts itūs naatkareibys godus voldūšī politikaņi ar sovuom vaļdeibuom ir na struodovušs, a džylynovušs. Nu, džylynuotoji viņ pi varys bejušs, kas laiku provadušs, a rezultativuo dorba tai i napastruodovušs.

Klausūs i verūs, ka otkon taidus pat džylynuotojus gryb dalaist pi varys. I izaruoda, ka pats prezidents ir vysu paguojušū godi džylynovs viņ. Nyu, atsarass gribeituoji, kuri ceņssīs jū dabuot uorā nu prezidenta piļs, lai tī īmuoneitu sovejū džylynuotoju. Tai pat kai tys otkon nūteik ar vaļdeibu.

Nudi, nasaprūtu! Pīmiņu, ka as beju tymā vacumā, kai tādiņ myusu atjaunuotuo vaļsts, as tai džylynovu molku ar naosynuotu zuodži, tāvs mani salomova i pasaceja skaidri i gaiši; „ Nav kuo tī bez delas džylynuot tū molku. Ka namuoki pats zuodža izosynuot, to pasoki maņ i as kaidā vokorā tū izdareišu.”

A te – tauta pasoka par džylynuošonu. I pasoka na tai prosta, a cīši nūteikti i daže vardarbeigi. A džylynuotoji, na īt sovus dorba instrumentus izosynoj, a sauc tīsu i tīsoj tautu. Ot, tev i ša – breiveiba i tautys vara! Te tautu na atvuica nu džylynuošonys, a par spāku pīradynoj, vardarbeigi spīž vysai vaļstei palikt par džylynuotojīm, a na par vaļsts cālojīm. Ot, tai nyu saīt itymā myusu dzeivē …

Petru Pīters