Kam tī mīži teirumā, kam tuos rūzis vydā zīd?
Taids vaicojums izskaņ vīnā nu skaistuokajuom Zīmeļlatgolys tautysdzīsmiem. I tī pat iz reizis ir atsaceiba: „Bruoļam mīži teirumā, muosai rūzis vydā zīd.”
Skaisti! Voi ta nā? Ka bruoļa gryutais dorbs īt sadereibā ar muosys dailis dorbu … I te maņ īguoja pruotā leidzeiba, viņ, na lobā saisteibā ar ituos tautysdzīsmis paustū dūmu.
Latvejā bruoļi zemnīceni pa vysu vaļsti raunuos svīdrūs, lai ražuotu sovai vaļstei sovu teiru i gordu ādamū produkceju. A „muosa”- Reiga ar sovīm parteju „rūžu duorzīm” bruoļu zemnīceņu dorbu nanam par pylnu. Reigai lobuok i gorduok siedeit pi uorzemu lobumu kluotajīm goldīm. I tai – vysa nauda nūīt sveštautu bryugonīm, sovus buoleleņus pataisūt par ubogu torbys nesejīm …
A, nyu, ka buoleleni Reigā sabrauce ar sovīm „kumelenīm”, kas na viņ i atliece dieļ „mīžu teirumeņa”.
Redzīs, ka zemnīceņu buolelenīm byus otkon juojuoj iz Reigu, lai natyktu nauda izsvaideita zemis i gaisa ceļīm pi uorvalstu soldmieleitēm, kas tai aizdzīdovušs Reigys parteju „rūžu duorzu” saiminīku austenis i deveiguos sirsnenis, ka Latgolys i Vidzemis ceļīm palykušs puori viņ daži voskonī santimeņi.
Tai, nu, ir daguojs, ka, kai senejūs bandu laikūs, oruojam vīnā rūkā juotur orklys, a ūtrā zūbyns.
A kū cytu dareisi, ka vara gryb vaļdeit, a na ryupeitīs par tautu, kura jū baroj …
Petru Pīters
