Ceiņa ar sevi

Pyrms nedelis dzierdeju radejā vīnu Reigys latgalīti, kurs stuosteja, ka naseņ, kod jis atbrauce iz Latgolu, īraudzeja, kai te vyss pasamainejs iz lobū pusi – jauni trotuari, glaunys vīsneicys, veikali pylni ar smukom montom, uzpiļdis stacejis kai Eiropā, mobilī telefoni kotram škoļnīkam.

Klausūtīs jū, maņ īskrēja pruotā, ka jis navā latgalīts, a turists. Ka tys, par kū jis stuosta, ir taišni tys, kū pamona kotrs turists kotrā sovā maršrutā. Daže naizkuops nu autobusa – verūtīs tikai pa lūgu. Voi nu pavysam bez kaidys īprīškejis informacejis, voi ari paskaitejs ceļvežus, kurūs sakombināti popularuokī stereotipi.

Latgalīšu atvārtums i gostmīleiba, Aglyunys Dīvmuote, Zylū azaru zeme, dzaltoni zaļuo keramika. Bezpruota šmakovkys dzeršona, puiši ar mītim ali orčikim rūkuos, naapkiereiba, kiutrums, skaudeiba, cytu aprunuošona.

Tikpat daudz es zynu par Meksiku i Japuonu, ni reizis tī nabyudams. I, pabyudams tī pat garuokū turisma biznesa pīduovuotū braucīņa laiku – divys nedelis, es eistineibā izzynuotu tikpat daudz, a može i mozuok, nakai pasaverūt televizoru voi pasakapačojūt internetā.

Par tū es jau paseņ nabraucu nikaidūs turisma braucīņūs.

Ari dzejūli var byut taidi, kurus kai ba turists sarakstejs. Oskars Seiksts daže izpietēja, kuram nu poetim varātum byut līkams golvā turisma poezejis kieneņa krūņs.

Par turistu var palikt pat sev namonūt. Pat naizbraucūt nu sova pogosta. Pat guļūt paralizietam godim iļgi gultā.

Četri kilametri nu piļsātys. Kotra trešuo sāta pamasta – lūgi aizsysti, izlaupeita, cyta daže nūdadzynuota. Zeme ap celim naapstruoduota. Tī, kas sajam penseju, – vītejī bagaturi. Nazynu, voi cylvākim, kuri te dzeivoj, ir lels prīks nu tuo, ka tyvajā piļsātā ir moderna vīsneica. Ka asfaļta ceļa molā pastateituo degvīlys uzpiļdis staceja ir duorguokuo byuve vysā pogostā. Nu tuo, ka jī myn pa ledva izremonteitim trotuarim ar humpaluos ar atlaidi nūpierktim kadakim.

Turists ir cylvāks, kurs īrauga tikai tū, kū jam gryb paruodeit. Turists ir cylvāks, kurs īrauga stereotipiskū i uoriškeigū. Navā nikuo švaka, ka Latgolā remontej trotuarus, pasaruoda modernys vīsneicys, a ceļu moluos – ar pošom jaunuokajom tehnologejom apreikotys degvīlys uzpiļdis stacejis.

Vaiņa ir na jau itymuos lītuos, a myusu golvuos. Ari munā.

Ar turistu sevī es ceinūs jau cīši iļgi, na vysod tys saīt.

Tūmār maņ lobuok pateik moralizietuoji, kurim na vysod saīt byut taidim, kai jī vuica cytim, nakai tī, kuri atkluoti i patīsi pasoka, ka jī ir izlaideigi, slavys i naudys olkstūši i tikai prīcojās par sovu uzadreikstiešonu i atkluoteibu.

Olūts:
www2.la.lv/lat/latvijas_avize/jaunakaja_numura/kulturzimes/?doc=42158