Sanūs omotu škola Berķenelē

Tiuleņ piec Zīmyssvātku, nu 26. leidz 30.decembram, bīdreiba „Latgolys Studentu centrs” sadarbeibā ar „Minskys Studentu etnografiskū bīdreibu” i Daugavpils rajona padūmis „Tautas izglītības un kultūras centru” reikuoja seminaru „Sanūs omotu škola” Daugovpiļs rajona J.Raiņa mājā Berķenelē. Pīcys dīnys dalinīkim beja vareiba īsavavuiceit dažaidus omotus, kuri niu vaira nav tik populari, bet ogruok bejuš zynomi kotrā kuorteigā Latgolys lauku sātā, vaira uzzynuot par čyguonūs īšonu, taiseit i ēst tradicionalūs iedīņus.

Ideja par Sanūs omotu školu pasaruodeja 2007. gods vosorā, kod LgSC sadarbeibā ar vītejom pošvaļdeibom eistynuoja projektu „Guojīņs piec aizguojušuo” i kūpā ar Minskys Studentu etnografiskū bīdreibu devēs ekspedicejā pa Latgolu, Latvejis – Boltkrīvejis pīrūbežā. Ekspedicejis laikā dalinīki dazynuoja vaira par dažaidom niu asūšom etnografiskajom sovpateibom, kai ari taidom, par kurom ogruok nikuo nazynuoja. Taipoš tyka nūstyprynuoti kontakti ar boltkrīvim.

Piec goda, 2008. gods vosorā LgSC sajēme aicynuojumu nu Minskys Studentu etnografiskuos bīdreibys pīsadaleit nūmetnē Boltkrīvejā. Nedeļu dalinīki dzeivuoja dzeraunis sātā, meža vydā. Ogruok „Tereški” bejus sādža, niu pastuoveigai nateik apdzeivuota nivīna sāta, tik vosoruos pa šaļtei teik apdzeivuotys trejis, puorejuos jau paspiejs „sagrauzt” laika zūbs. Ka ir vajadzeiba piec myusdīnu civilizacejis naatjamamys sastuovdalis – elektreibys, teik darbynuots dīzeļgenerators… Nedelis laikā dalinīki nasteidzeigā gaisūtnē ryupējēs par syltu povordu, iedīni, sātys apkūpšonu, kai ari īsavuiceja dažaidus rūkdorbus, pīmāram, peit jūstys i prīvis, aust ar stuovim, dažaidus omotus – taiseit postolys, veļt vylnu.

Atsagrīzuš Latvejā LgSC bīdri nūlēme reikuot leidzeigu pasuokumu Zīmyssvātku breivdīnuos. Koč gon projekts nagiva finansialu atbolstu nu fondim, tūmār „Sanūs omotu školys” ideja īdvesmuoja napasadūt i meklēt veidu, kai eistynuot projektu. Miļzeigu atbolstu eistajā breidī deve Daugovpiļs rajona padūme, kas nūdrūšynuoja seminara nūrisis vītu J.Raiņa sātā Berķenelē. Sovukuort iedīņi i materiali omotu apgiušonai tyka saryupāti pošu – organizatoru i dalinīku – spākim.

Ūtrajūs Zīmyssvātkūs dalinīki īsaroda i īsakuortuoja seminara nūrisis vītā. Laiks paguoja īsapazeistūt, sadolūt dorbus – i vysa seminara laikā poši dalinīki uzpasēja gon kuorteibu, gon ari taiseja ēst tradicionalūs iedīņus. Goldā tyka lykts ozbors, zierni ar speki, pupys, i.c. Pyrmuos seminara dīnys vokorā tyka apgyuta naapstruoduotys vuškys vylnys sagatavuošona tuoļuokai izmontuošonai – vylnys sukuošona.

Sastdine – trešī Zīmyssvātki tyka veļteiti čyguonūs īšonys tradicejai. Dalinīki Zitys Onckulis vadeibā vuicejuos dzīsmis i rūtalis, veiduoja sev maskys. Gols golā Birķineļu īdzeivuotuojus apcīmuoja vairuokys čygonkys i čyguons, koza i vylks, čyguons ar luoci, zyrgs, nabašnīks, smierts, valns i.c. Vokorā tyka puorrunuoti īspaidi i pīdzeivuojumi, kai ari dzīduotys latgalīšu i boltkrīvu tautys dzīsmis.

Svātdine, koč i svietejama dīna, seminara dalinīkim paguoja aktivi dorbojūtīs – boltkrīvīte Anastasija Hluško īruodeja vylnys veļšonu, sovukuort Zita Onckule celaiņu aušonys tehniku. Leluoka atsauceiba beja vylnys veļšonai; gondreiž vysi dalinīki izavēlēja veiduot sev nu vylnys zečis. Itymā dīnā seminarā daleibu jēme ari Daugovpiļs rajona Kuļturys noma folklorys kūpys „Dyrbyni” dalinīki i Vabalis pogosta etnografiskuo ansambļa vadeituojs, muzykants Arturs Uškāns. Leidz ar tū vokorpusē i večerinka varēja suoktīs. „Sanūs omotu školys” dalinīki izadoncuoja i izadzīduoja, īpazeistūt latgalīšu, baltīšu, boltkrīvu i cytu tautu dančus i dzīsmis.

Pyrmdinē dalinīki turpynuoja dorbuotīs – vuicejuos peit auklys, izgatavuot traukus nu solmim. Piecpušdinē jēmem daleibu J.Raiņa mājas Berkenelē reikuotū fotografa Gunta Kaminska dorbu izstuodis atkluošonā.

„Sanūs omotu školys” organizatoru i dalinīku vuordā soku lelu paļdis par sadarbeibu i atbolstu Daugovpiļs rajona padūmei par seminara nūrisis vītu – breineiguos, radūšuos aurys i atmosferys pīpiļdeitū J.Raiņa māju Berķenelē!

Paļdis dalinīkim par atsauceibu, dorba grupai par atbolstu i sadarbeibu pasuokuma reikuošonā! Eipašs paļdis Zitai Onckulei, Dagnijai Bramanei, Ilzei Mežniecei, Anastasijai Hluško, ka īruodeja dažaidus omotus, dalejuos ar seminara dalinīkim ar sovom zynuošonom, pīredzi, padūmu i materialim!