Vasali vārušīs! Latgalīšu teatra serials

Baļtinavys pogosta dramatiskais kolektivs „Palādas” izvaduši jau sastū dali savdabeigajam teatra serialam „Ontans i Anne”.
Kotrā izruodē diveju stuņžu garumā skateituoju zals var apsavērt Latgolys ļaužu sadzeivis situacejis i gondreiž tik pat iļgi leidza smītīs par vysaidim atgadejumim i suleiguos latgalīšu volūdys izsacejumim. Kai atzeimāts lugys programys bukletūs – izruode teik spālāta latgalīšu volūdā, Baļtinavys izlūksnē.

Vysaiduos Latvejis vītuos ir ruodeitys Ontana i Annes dzeivis situaceju lugys: „Ontans i vampiri” (1. daļa), „Kuozu godu jubileja” (2. daļa), „Ontans izaklaidej” (3. daļa), „Ontana tragedeja” (4. daļa) i pīktuo daļa „Ontans i plāšneica” (ūtrais vuords nūzeimejūt „burve” voi „dzīdneica”). Juoatzeimej, ka 19. decembrī, Baļtinovā bejuse jau sastuos dalis „Ontans i Zīmyssvātki” pyrmizruode.

Lugys atstuostu ite raksteit nabyus lelys jāgys – tys vyss ir juoradz i juodzierd kotram pošam deļ tam, ka vyscaur ir breineigais latgalīšu humors – spieja pasasmīt par sevi i sovim dzeivis gryutumim.

Golvonuos lūmys izruodē spielej Baļtinovys vydsškolys direktors Imants Slišāns i tuos pošys školys latvīšu volūdys i literaturys školotuoja Anita Ločmele. Starp cytu – taišni Anita ir lugys režisore i vysu „Ontona i Annes” daļu autore, koč iz literarajim dorbim līkn pseidonimu Danskovīte – itys vuords saisteits ar juos dzymtū pusi.

Šudiņ nūtiks ari Danskovītes pyrmuos gruomotys “Lugas” prezentaceja. Tymā īškā ir treis lugys i vīns skečs: “Ontans i Anne”, “Sīvasmuotes senču laiki”, “Tāva meitas” i “Duorgīs pierkums”. Gruomota izdūta latgalīšu volūdā – autoris redakcejā 21. godusymta Baļtinovys izlūksnē. Izdeviejs – Z.s. „GIRG”, Jākupāni, 2008. gods.

Itū gruomateni dūmojams vysdreižuokajā laikā varēs īsaguoduot ari interneta veikalā: madeinlatgola.lv

I. Slišāns „Latgalīšu Gazetai” pastuosteja, ka jūs izruode ir izapeļnejuse lelu atsauceibu Bolvu, Guļbinis i Alūksnis rajonā, bet Daugovpiļs i Kruoslovys rajonā gon vēļ leidz itam nav spālāts. I. Slišāns skaita, ka 2. daļa jīm ir izadavuse vyslobuokuo, bet ari cytys teik sagaideitys ar pylnim skateituoju zalim, aplausim i smīklim – jī asūt jau pat drusku izlutynuoti ar syltu uzjimšonu, deļ tam 14. decembrī Rēzeknī pustukša zala prīškā spēlēt ir bejs pat drusku jūceigai.

Guoduosim, ka kod na viņ kaidu nu Ontana i Annes teatra dzeivis daļom varātu apsavērt ari Daugovpiļs pusē.