La-La-Dra Daugovpilī

9. decembrī Latvīšu kulturys centra koncertzalā nūtyka pasuokums “La-La-Dra” (Latgalīts Latgalīšam Draugs), kū reikova bīdreiba “Latgolys Studentu centrs” ar Latvīšu kulturys centra atbolstu.

Ailinīki Juoņs Ryučāns, Valentins Lukaševics, Raibīs Suņs i Arturs Uškāns, kai ari stuostu autors Jureits (Jurs Viļums), Daugovpiļs rajona kulturys noma folklorys kūpa “Dyrbyni” i grupys “Dabasu Durovys” lideri Arņs Slobožanins i Edgars Kluss ar franču draugu Janu centēs radeit Adventa nūskaņu. Itymā reizē dzyma jauns muzykals projekts – Arņs Slobožaņins kūpā ar “Dyrbynu” puišim atskaņova “Dabasu Durovu” hitu “Piparmātru čajs”.

Puorsteidze ari Jureits ar sovu viestejumu par tū, kai piec 100 godim Spanejā, Vydsjiurys krostā latgalīšim byus zemes gobols, iz kura byus izveiduota Latgolys Republika i nu kurīnis div reizis nedelī byus lidmašyna iz Latgolu.

Ari V.Lukaševičs beja originals – sovus jaunuokūs dorbus laseja ar kliepdatora paleidzeibu.

Sarunys, dzeja, dzīsmes latgalīšu volūdā turpynovās piec “La-La-Dra” oficialuos dalis, kod visi sasapuļceja muokslys duorzā “Gliemezis”, kū par sovu kūpā saīšonys i atpyutys vītu atzynuši daudzi latgalīšu muzykanti, radūšī cylvāki i studenti.

Juopastuosta, ka “La-La-Dra” pyrmī pasuokumi izskanejuši jau paguojušajā i aizpaguojušajā godā. Tūlaik Latgolys Studentu centrs organizeja vairuokys poetiski muzikalys sasatikšonys vysaiduos Latgolys vītuos, lai popularizātu latgalīšu volūdu, muzyku, literaturu.

“La-La-Dra” sasatikšonys tiks reikuotys ari cytugod – pyrmuo byus 15.janvarī Reigā – seikuoka informaceja LaKuGa.LV nūtikšonu sadalī.