Tāraudu Ingrida / Dzejūli

***
korsts
puosoku laiks pazuds aiz tyvejuos
deča molys
krepteigi tevi es da itam laikam
pa pilīņam meiluoju
zalta dzierksteli nu acim
izdadzynuoja nagleitus
rūbus sirdī
nu aizvakarvokora sluopst
korsts

***
izdzīdi itū dzīsmi bez vuordim
bez meļdeņa
bez maņa
vacajā upē īmierkuse kuojis
ar saplaisnuojušim papīžim
puspalaime meditej
diskretiski daskuorīni
nu paītgaromgribūša
siermbuordaina kunga
kuram vairuok par
sirsneibu nikuo nav
plyka tei dvēsele
kas bez maņa

***
a zyni kod otkon byus
par reita pamūdynuojumu
cīti uobeli uz spylvyna nūlykti
nūbādzynuoti vaicuojumi
nazyn kurymā skaņā voi klusmē
atsaver i saprūti

***
stypra kopeja
sanyknuota sīvīte
aizguojuse zeču adeišonys
tradiceja
pusdīnys snīg
lauleibu gultā
čyuska sovus gradzynus vej
a jys brauc ar mopedu
pa putekļainim celim

***
septenis reizis zvons
tryucynoj nu apdūmuotkys
bezgaleibai nav ni vuordu
ni dūmu ni pīdūšonys
sapyni nūsauc eistumu
kod golva pa mīgam
pasagrīž iz austrumim

***
ilgi
var saukt ilgi
ilgi
meļneicu zapti salejom
burkuos
salīkom
godim lai irā
malnys lyupys
malnys lizeikys
ilgi
var saukt ilgi
ilgi

***
lyki rūku uz muna vādara
sajuti pukst treisynoj
tauryni dzygoj
slapni moti puor byudim
i lyupys gona soldonys
taidā šaļtī
nivīns nazyna beigu

***
kalendars maloj
stuņdinīks maloj
akacs maloj
veikaļneica maloj
telepona gruomota maloj
piersti iz tastaturys
apsamīrynoj