Zynuošona ir spāks – latgalīšu volūdys kursi

Nu ituo goda 4. novembra Latvejis Nacionalos bilbliotekys telpuos nūteik latgalīšu rokstu volūdys kursi, kū izaukliejuse bīdreiba „Latgolys Studentu centrs” i beidzūt palaiduse pasaulī.
Da goda beigu vysi interesenti par veļti var īt iz nūdarbeibom, kū organizej i voda LgSC bīdri. Nūdarbeibys voda Mg. philol. Muora Mortuzāne i filologejis maģistrante Kristīne Zute.
Nu jaunuo goda kursi tiks turpynuoti, apgiustūt raksteibu dziļuok, tuoļuok, precizuok. Jī nūtiks pavasara i zīmys semestrī.
Kab lobuok īsavuiceitu raksteibu atbylstūši sovom zynuošonom i spākam, ir sataiseitys divejis grupys ar atškireigom prīkšzynuošonom.
Pyrmuo grupa (sovejūs vydā saukta par „smukajim”) dūmuota tim, kurus interesej latgalīšu volūda, tok leidz šam nav bejs nikaida nūpītna sakara ar jū. Grupu apmeklej cylvāki, kuri saprūt latgaliski, a poši narunoj. Nūdarbeibuos golvonais akcents lykts iz izpratni par volūdu, vysaidu specifisku īzeimu apgiušonu. Tys paleidzēs suokt runuot latgaliski, jamūt vārā i apgiustūt tū, kas rakstureigs latgalīšu volūtai.
Ūtrajā grupā (sauktā par „gudrajim”) vuicuos tī, kuri latgaliski runoj breivi i muok raksteit, tok gryb dareit tū pareizi, saskaņā ar jaunajim ortografejis nūsacejumim, kas tyka pījimti 2007. godā. Ūtruos grupys nūdarbeibuos golvonuo viereiba teik gramatikai i ortografejai – kai pareizi pīraksteit tū voi cytu lītu, raugūt aizstuot jau pīrostū „kai dzieržu, tai i rokstu” ar „kai pareizi, tai rokstu”.
Raksteišona i skaiteišona latgalīšu volūdā nav nikas jauns, gaišuokī Latgolys pruoti tū ir dariejuši jau godu symtim. Tok pa lelai daļai, sevišķi beidzamā laikā, kotrys tū ir dariejs piec sovys saprasšonys.
Nazynuot nav kauns, kauns ir nagribēt zynuot. Partū LgSC organizeitī latgalīšu rokstu volūdys kursi ir sūļs tiuļuok vīnai normeitai latgalīšu rokstu volūdai, kas byus puorskaitama i saprūtama vysim latgaliski runojūšajim. Tys ir vīns sūļs nu kūpeiguo ceļa, kab sabīdreibā caltu volūdys prestižu i lītuošonys bīžumu.
Zynuošona ir spāks, kas var pagrīzt pasauli. Latgalīšu rokstu volūdys zynuošona vaira nūder deļ seve i sovys vierteibys apsazynuošonys i ceļšonys, tok, kai daudzi soka – ari praktiskajā dzeivē i pat karjerā.
Vīns nu rokstu volūdys kursu mierķu ir izstruoduot vuiceibu leidzekli, praktiskūs aizdavumu kruojumu latgalīšu rokstu volūdys apgivei. Tys dūs īspieju īsavuiceit raksteit i puorbaudeit sovu muoceišonu na tikai tim, kam kursi ir tiuli i pa ceļam, a sevkuram cytam interesentam, kas grybātu apgiut latgalīšu rokstu volūdu sovim spākim sovā sātā.
Paļdis Latvejis Nacionalajai bibliotekai par sadarbeibu, telpom i syltū pījimšonu! Raksteibys apgiušona ir sūļs pretim skaiteišonai. Lai jums vysim biblioteka ir vīta latgalīšu i pasauļa gruomotu skaiteišonai i spāka giušonai!