Latgolys Radejis zinis (14.11.2008.)
15. i 16.novembrī nu plkst.10.00 Ruguoju sporta nomā nūtiks školuotuoja Ulda Feldmaņa pīminis kausa izceiņa basketbolā. Daleibu tymā jims Kubulu, Vactylžys, Bierzpiļs, Bolvu, Lozdukolna i Ruguoju pogostu komandys.
Šudiņ, 14. novembrī, plkst. 9.00 Naturalizacejis puorvaļdis Daugavpils RN telpuos, Gimnazejis īlā 27, 14 Daugavpils pylsātys īdzeivuotuoji sajims Ministru kabineta reikuojuma izrokstus par uzjimšonu Latvejis pylsūneibā naturalizacijis kuortībā.
Projekta “Studenti Latvejai” laikā ceļojūšajā gruomotā Latvejis vaļstij savuokti vairuok nakai 800 nūvieliejumi nu 20 Latvejis augstškolom. Šudiņ projekta komanda ar gruomotu gasteis Jelgovā Studentu dīnuos i Latvejis Lauksaimnīceibys universitatē. Bet 19.novembrī i 20.novembrī projekta nūslāguma vieliejumus raksteis Daugavpiļs Uņiversitatis i Rēzeknis Augstškolys studenti. Novembra beiguos gruomota tiks svineigi pasnīgta Latvejis Vaļsts prezidentam Valdim Zatleram.
Šudiņ plkst.19 Rēzeknis pylsātys kulturys nomā nūtiks koncerts “Saskanēt, sadimdēt, sadzīduot”, kura gaitā tiks sveikti Rēzeknis Gūda pylsūni i pasnīgti dūmis Atzineibys roksti. Šūgod Rēzeknis Gūda pylsūņa apbolvuojums daškierts Irēnai Silinevičai par īguļdiejumu Rēzeknis pylsātys atteisteibā, Rēzeknis augstškolys izveidē i izgleiteibys veicynuošonā i Jānim Karro – par īguļdiejumu Rēzeknis pylsātys atteisteibā.
Šudiņ plkst.10 Daugavpils dūmē tiks atkluota Latvejis Republikys proklameišonys 90.godadīnai veļteita zynuotniskuo konfereņce “Daugavpiļs Latvejā – Latveja Daugavpilī”. Konfereņcē tiks aplyukuota pylsātys viesture Latvejis viesturis kontekstā, iztirzuotys aktualuos pietnīciskuos paruodeibys kulturviesturē i diskuteits par Daugavpiļs atteisteibys aktualuokīm vaicuojumim. Konfereņcē jims daleibu vairuok kai 100 daleibnīki nu Daugavpiļs i tuos sadarbeibys pylsātom, nu Lītovys pīrūbežys regionim, kai arī puorstuovi nu Boltkrīvejis i Krīvejis konsulatim Daugavpilī.
Īzadedzīs par Latveju! Skrīņ par Latveju! 18. novembrī Leivuonūs nūtiks skriejīņs pa pylsātys īlom. Saceņseibu suokums plkst.12.00 pi pylsātys stadiona. Tymuos teik aicynuoti jimt daleibu vysi interesenti, bez vacuma īrūbežuojumim. Kotrs skriejīni veikušīs sajims soldonu bolvu, čaju ar capumim i ‘spāka’ bīzputru. Uzvarātuoji sajims arī medalis i naudys bolvys.
Šudiņ Rēzeknis rajona padūme plkst.14 Latvejis Republikys proklameišonys 90.godadīnai veļteitejā pasuokumā tiks sumynuoti konkursa “Rēzeknis rajona sakūptuokīs pogosts 2008” uzvarātuoji. Pasuokuma gaitā par profesionala, gūdpruoteiga i rodūša dorba davumu nūvoda i vaļsts lobā Rēzeknis rajona padūme izsaceis atzineibu lobuokīm pošvaļdeibu prīkšsādātuojim, rajona padūmis darbinīkim, īstuožu i uzjāmumu vadeituojim, kulturys darbinīkim i sponsorim. Par pošaizlīdzeigu daleibys jimšonu Ašņa donoru kusteibā Rēzeknis rajona padūmis Atzineibys rokstus pasnīgs arī pīcim aktīvuokīm Rēzeknis rajona donorim.
