Puordūmys Latgolys pietnīceibys instituta konferencis sakarā
![](https://lpr.gov.lv/wp-content/uploads/2006/baneri/974.gif)
Mes muocamēs na tikai tod, kod myusim stõsta, bet ari nu cytu pīmāra.
Nabyus pēc 100 godim latgalīšu volūdas vai latgaliskuma, jo mes navaram turētīs pretim lelajam tehnoloģiskajam spīdīņam, kas roda lelpilsātas un ar tom saisteitū vidi. Nu nabyus tai, kai beja! Par tū līcynoj ari pīmāri turpat Špoģūs pēc konferences.
Munuprōt, trōpeigi izateicēs prof. H. Soms- latgalīts vyspyrms ir krītns cylvāks. Runojūt par pīmāru, kam leidzynōtīs, grybu izteikt dažus nūvārōjumus pēc konferences- pi golda pījimts pasateikt Dīvam un pōrsakristeit…aizmērsom. Sīvas nūdzīdōja dzīsmu- mes aplaudejam, prūtams,- paļdis jom, bet tūmār latgaliskō dzīsma- myusu ikdīna. Mes tū pījēmem kai prīkšnasumu, a varējom leidza dzīdōt. Nav taču sveša dzīsma. Un ari apsveikums jubilaram- pēšķi sōkom dzīdōt latviski, lai gon varam latgaliski!
Naizbāgami ari myusu volūda, tradicijas apaugs ar kū cytu, jaunu, varbyut na vysod lobōkū. Kōpēc leidz šam izdzeivōja latgaliskais?- Jo beja stypras, lelas ģimenes, praktizeita kristeigō ticeiba, gon dorbaudzynōšona, gon īpaši ētiskō, religiskō audzynōšona nūtyka ģimenē. Tagad ģimenes vide ir ūtrajā plānā, pyrmō ir skūla. Dūmoju, ka lobas lītas mēģinoj vērzēt LPI un cytas latgaliskōs institucijas, tikai naaizmērssim Dīvpaleigu! Ni stundis, ni fakultativi navarēs uzturēt latgaliskū, dreižōk tys byus laiks, kū pavadeisim kūpā, mōcūtīs vīns nu ūtra ģimenē, bīdreibā, interešu grupā, vosoras vai cyta nūmetnē.
Ja grybam rezultatu, tod pyrmōk ryupēsimēs, lai skūlas mōceibu un audzynōšonas programmā byutu uzsvors uz tū, kōpēc gyut zynōšonas, navys- cik daudz jōzyna. Pastōv reali draudi, ka nu mōceibu programmom izjems kulturas vēsturi, ētiku. Paļdis Dīvam, tagad ir taids prīkšmats kai kristeigō mōceiba, bet ari te naizteik bez darvas karūtes mada bucā- tys ir izvēles prīkšmats, kam pretstota ētiku, kurā nav poša ētikas vajadzeibas izraisētōja- Dīva! Socialōs zineibas ari ir izkrūpļōts prīkšmats, jo jimā jōmōca nu vysa kō pa biškai…nu taida informacijas sajaukuma nalabi matās!
Runas par latgalīšu volūdu kai valsts mārūga volūdu ir utopiskas. Latvija byuteibā ir tei poša Latgola, tikai „cytā kuleitē”- gon volūda ir pōrjimta nu latgalīšim, gon karūgs, gon ari cylvāki- latgalīšu Latvijā ir vairōk kai cytu! Vairōsimēs un pīpiļdeisim zemi, tod navajadzēs raudōt par zaudātū! Golvonais kapitals ir latgaļīts, navys latgaļīšu volūda! Jo padūmoj un apsver, tod- kas gon ir myusu gaušonōs Myužeibas prīškā!
Skateisimīs uz pozitivū, kū myusdīnōs spēj latgalīts, tod byus vēlēšonōs byus LATGALĪŠAM! Mozlīt vairōk pošlapnuma un uz prīšku! Lai Dīvs paleidz!
Ar cīnu, Marta Bicāne
(skūlā mōcu kristeigū mōceibu, ētiku un socialōs zineibas)
Roksts publicāts bez autoris raksteibys korigiešonys nu LaKuGa.LV pusis