Kas jauns LgSC dzeivē?
![](https://lpr.gov.lv/wp-content/uploads/2005/dezuratteli/23.jpg)
Seņ nav stuosteits, kas jauns Latgolys Studentu centra (LgSC) dzeivē.
1.) Ituo goda 10. oktobrī Rēzeknē nūtyka vaļdis sēde. Sēde beja lemttīseiga, īsaroduši beja vysi vaļdis lūcekli.
LgSC tyka pījimti 3 jauni bīdri, kai ari 4 atbaļsteituojim tyka atjaunuots bīdra statuss. Leidza ar tū LgSC niu ir 59 bīdri i atbaļsteituoji, 33 nu jūs ir pylntīseigi bīdri ar bolstīseibom.
Paļdis tim, kas puorskaiteja bīdra naudu, koč i piec vaļdis sēdis! Par bolstīseibu atjaunuošonu tiks lamts tyvuokajā vaļdis sēdē.;)
2.) Taipat vaļdis sēdē tyka lamts par darbeibys planu tyvuokajam laikam i 2009. godam, tymā skaitā regionalūs biroju atteisteibu i pasuokumim, kas byutu nūdereigi sabīdreibai i veicynuotu latgaliskuo pastuoveišonu, saglobuošonu, atteisteibu. Ka Tev ir kaidys idejis i prīšklykumi, aicynoju juos izsaceit. Ka ir interese par kaida projekta eistynuošonu, drūsai vaicoj padūma.
3.) Atbylstūši vaļdis lāmumam ir sagataveitys i tyvuokūs dīnu laikā tiks izsyuteitys div viestulis:
Nacionalajai radejis i televizejis padūmei par budžeta finansiejumu latgalīšu raidiejumim i
IZM, Ministru prezidentam, Kulturys ministrejai, Latgolys plānuošonys regionam ar vaicuojumu par 2007. godā IZM dorba grupys īsaceitūs prīšklykumu realizaceju i LgSC
īrūsynuojumim latgalīšu rokstu volūdys aizsardzeibai, saglobuošonai, atteisteibai.
Lobumu gryuts izreiz paredzēt, tok vajag kužynuot.
4.) LgSC atkuortuoti īsnīdze projekta pīsacejumu Reigys dūmis Kulturys departamenta organizeitajā projektu konkursā, meklejūt finansiejumu projektam “Baļtinovys teatra vīsizruode Reigā”. Ir īcere ari Reigys i juos apleicīnis latgalīšim i pošdarbeibys
teatra interesentim paruodeit Latgolā i uorpus juos īviereibu givušū lugu “Ontons i Anne”.
Dīvamžāļ ari itymā reizē īcere natyka atbaļsteita.
Kab itei ideja i prāca napagaistu i kab izruodei nabyutu juonūsoka īejis moksa, teik turpynuota sadarbeiba ar Reigys apleicīnis pošvaļdeibom, dūmojūt par ceļa izdavumu segšonu. Par izruodis laiku i vītu tiks ziņuots atseviški.
Ka ir kaida ideja, kai varātu pīsaisteit finansiejumu, dūd ziņu. Tāme nav lela, puors symti latu.
5.) 21. okt. 18:00 LgSC Reigys birojā nūtiks Zeču bals ar spūku stuostim.
Adress: Antonejis īlā 8-3/6, Reigā.
Leidza juojem pošys glaunuokuos zečis, svece, spūku stuosti i šausmu stuosti, koč kas gords (bet na capumi).
Organizej Reigys biroja vadeituoja Vita Briška. Ka kas, sasazynoj ar jū: 26118413, vita.briska@gmail.com.
6.) Daugovpilīši ir davuši ziņu, ka trešdīnēs Daugovpilī klubā “Glīmiezs (Gliemezis)” muzyku spielej (Dj) Arnis Slobožanins.
Iz prīšku ir īcere tī reikuot ari latgaliskus pasuokumus.
7.) 28. okt. suocās latgalīšu rokstu volūdys kursi Reigā, nūtiks Latvejis Nacionalajā bibliotekā Barona i Elizabetis īlu krystcelēs, 1. stuova periodikys skaiteitovā. Suokums 18:00.
Kursi suoksīs ar latgalīšu ortografejis komisejis prīšksādātuojis Dr. philol. Annys Stafeckys lekceja par myusu dīnu ortografeju, ortografejis komisejā padareitū i par nūsacejumim.
Ortografeja ir pījimta vaira kai pyrms goda, sabīdreiba ar jim tyka īpazeistynuota majā Rēzeknē, tok kursu suokums ir loba vareiba ari Reigys sabīdreibai īsapazeit ar raksteibys normom, mazynojūt stereotipus i paruodūt vacuo i jaunuo, raksteibys tradicejis i filologiskūs pietiejumu rezultatā pamaineituo sasabolsuošonu raksteibā.
Lekceja ir par veļti i atkluota, tī var īsarast kotrys i pajimt leidza sābrus i rodus.
Leidzeigys lekcejis par vysaidom temom, kas skar Latgolys kultururys, sabīdriskūs, ekonomiskūs procesus, ir īcarāts organizēt ari iz prīšku: Rēzeknē, Daugovpilī i Reigā. Juos ir paradzātys plašai klauseituoju auditorejai, kurus interesej
latgalistikys vaicuojumi.
8.) 4. novembrī 18:00 LNB suoksīs raksteibys nūdarbeibys, kū vadeis LgSC bīdris Mg. philol. Muora Mortuzāne i magistrante Kristīne Zute. Ka gribi īt iz kursim, lyudzu, pīsasoki pa e-postu lgsc@inbox.lv voi teleponu 29512432 .
Ka napaspieji pīsasaceit, ej vysleidza drūsai – byus tik prīca, ka kaids gryb sevi pylnveiduot. Var jimt leidza klasisbīdrus, kursabīdrus, kojubīdrus i dorbabīdrus, kam interesej latgalīšu rokstu volūdys vuiceibys.
Kursi ir par veļti. Ka gadīnī ir breiva nauda i interese, par vareibu zīduot kaidu konkretu lītu, par pīmāru, kancelejis precis varēs sarunuot iz vītys.
9.) Taipat LgSC aicynoj sasadorbuot privatpersonys i juridiskys organizacejis, kam ir siastūši LgSC mierki, veicynojūt Latgolys kulturvidis saglobuošonu, sabīdreibys informeišonu i latgaliskuos ideņtitatis, kulturys vierteibu sekmeišonu jaunīšu vydā.
Nu ituo goda vosorys LgSC ir īgivs sabīdriskuo lobuma organizacejis statusu. Tys zeimoj, ka zīduotuojs var giut divejus lobumus: namaterialū, respektivi, atbaļsteit jaunīšu organizaceju, kas veicynoj latgaliskuos pošapzinis pasaceļšonu jaunīšu vydā
i interesi par regionalū identitati, potenciali ari dzeivis i dorba vītys izvēli Latgolā, kai ari materialū: uzjāmumim uzjāmuma nūdūkļa atlaidi 85 %apmārā nu zīduotuos summys, privatpersonom īdzeivuotuoja īnuokuam atlaidi nu zīduotuos summys.
Ka gadīnī zyni kaidu, kam ir interese par LgSC mierķu voi konkretu projektu atbolstu, pasoki, ka par tū var sasazynuot ar vaļdis prīšksādātuoju.
Tys laikam vyss.
Vysmoz svareiguokais i aktualais vyss. 😉
Paļdis par viereibu i lai breineiga nedeļa i leits naizkausej i naparaun! 😉
Ar cīnu –
Ilze Sperga,
LgSC vaļdis prīšksādātuoja
Tel. +371 29512432
E-posts sperga@inbox.lv