Ui, lobs dorbs, kas padarāts!
Vaira kai vīns gods puordūmu, pīredzis, jaunu īspaidu, prīcys i suopju – tys vyss izkruots nu īprīškejuo studejis aļbuma “Plastilina pasaule” izīšonys i bejs par pamatu jaunom dzīsmem. Ituos saviļņuojušūs šaļtenis ari byus jiutomys jaunajā aļbumā, kas skanēs vaira “smoguok” i rokeiguok kai īprīškejī.
Jaunuo aļbuma prezentaceja byus 20.oktobrī i izreizis piec tuos grupa brauks koncerttūrē pa Latveju.
Aļbumu jau veiksmeigai dasaciejušs pyrmī singli. “Dzeivis maņ nav žāl” aizvadeituos vosorys laikā pabejs Latvejis radio staceju topu viersyunēs, i nu puora napazyudūt veļ arviņ. Pošu reizi aktivā radio staceju rotācejā atsarūn ūtrs singls “Iededzies par Latviju”, kas ir tituldzīsme Latvejis Instituta jaunīšu projektam “Latvija. Nākamie 90” i veļtejums Latvejis deveņdesmit godu jubilejā.
Latvejis Instituta direktors Ojars Kalneņš dzīsmi nūsaucs par eistynu roku i izasaciejs, ka tei klius par leidz dzīdomū dzīsmi jeb singalong, ari Latvejis Vaļsts prezidents V.Zatlers par “Iededzies par Latviju” izasaciejs atzineigai.
Aļbuma īrokstā pīsadaliejušs vairuoki Latvejā pazeistami muzyki, kai sūlejs grupys līders Aigars, paziņojūt par jaunuo albuma topšonu ituos vosorys suokumā. Kūpā ar Arti Dvarionas i Aishu, kas pīsadaluos dzīsmē “Iededzies par Latviju”, sovu roku jeb bolsu aļbuma topšonā dalykušs Jurs Kaukuļs (Dzelzs Vilks), Felikss Kigeļs, veiru kūpa “Vilki” i Leila Alijeva.
Borowa Mc soka paļdis leldraugam “Maxima” par atbolstu aļbuma i tyuris gataveišonā.
