Latgolys Radejis zinis (10.09.2008.)
Jākubpils rajona centrāluos slimineicys vadeiba ir naizpratnē par tū, kur lai daboj leidzekļus sovu darbinīku olgu paaugtynuošonai. Vaļsts obligatuos apdrūšynuošonys veseleibys agenturys nūsaceitī tarifi par snīdzmajim medicinys pakolpuojumim ir visim zynomi i jau pošlaik nasadz vysys uorstiešonys izmoksys.Šudiņ Preiļūs nūtiks Zemkūpeibys ministrejis i Latvejis Lauku foruma reikuots seminars Latgolys vītejom reiceibys grupom par normatīvajim aktim Lauku atteisteibys programmys 2007.-2013.godam pasuokumam “Vītejuos atteisteibys strategejis”.
Šudiņ Rēzeknē nūtiks seminars par vaļsts garantātajim socialuos apryupis i socialuos rehabilitacejis pakolpuojumim. Seminara laikā Socialūs pakolpuojumu puorvaļdē specialisti kluotasūšūs informēs par socialū pakalpuojumu i socialuos paleidzeibys sajimšonys kuorteibu i par vaļsts finansātajim socialuos apryupis i socialuos rehabilitacejis pakolpuojumim.
Nu 14. leidz 25. septembram Daugavpilī nūtiks tradicionalais, piec kuortys pīktais starptautiskais pleners “Marks Rotko – 2008”, Latgolys Radeju informej Daugavpils dūmis Kulturys puorvaļdē. Itūgod plenerā daleibu jims 11 dalinīki nu Ukrainys, Boltkrīvejis, Itālejis, Vuocejis, Dānejis, Krīvejis i Latvejis.
Šudiņ Daugavpilī Park Hotel “Latgola” latgalīšu pozitīvuo roka grupa “Dabasu Duorovys” puļcēs sovus draugus i atbaļsteituojus iz grupys pyrmuo albuma „Ļepetņīks” prezentacejis pasuokumu-koncertu. Kai pastuostie grupys menedžere Anna Briška, albums teik izdūts, kab veicynuotu latgalīšu volūdys daudzveideigū lītuojumu i kab raiseitu jaunīšu interesi par radūšajom izpausmem muzykā.
