Latgolys Radejis zinis (01.08.2008.)
Šudiņ Rēzeknē nu dorba tiks atbreivuoti 20 AS “Rebir” struodnīki; darbinīku atlaišona turpynuosīs da septembram, komer nu dorba byus atbreivuoti visi plānuotī 533 darbinīki. Uzjāmuma kadru daļā pastuosteja, ka uzjāmums ar septembri vairuok nakai pusi nu vysa uzjāmuma produkcejis plānoj ražuot Ķīnā. Rēzeknē septembrī paliks apmāram 300 darbinīki, kas turpynuos specializātūs instrumentu ražuošonu, kai arī dorbu tierdznīceibys i tehniskajā centrā.Šudiņ i reit Rēzeknis rajona Viļānūs i Modūnys rajona Buorkovā nūtiks VII Tautys muzykantu svātki. VII Tautys muzykantu svātkūs daleibu jims apmāram 150 dalinīki – muzykanti, vacmeistari i kapellys nu Medņevys, Salnavys, Ludzys, Rēzeknis, Viļānim, Reigys i cyturīnis, kai arī uorzemu gosti nu Lītovys i Igaunejis.
Šudiņ i reit atpyutys bāzē “Viktorija” nūteik Daugavpils piļsātys pošvaļdeibys vosorys spartakiāde. Daleibai sacenseibuos pīsasacejuš 10 pošvaļdeibys uzjāmumu i īstuožu komandys. Spartakiadis daleibnīki māruosīs spākim voleijbolā, minifutbolā, šautreņu mešonā, bumbys mešonā basketbola skalinē, armrestlingā i puorsteiguma stafetēs.
Nu šudiņdīnys Daugavpilī pīaug moksa par atkrytumu izvešonu, – da šam asūšū 73 santimu vītā par atkrytumu izvešonu īdzeivuotuojim mienesī byus juomoksoj 1,04 Ls nu cylvāka.
Šudiņ Bolvūs nūteik muzykys festivals “Osvaldiņš 2008”, itys festivals nūteik jau 10.reizi muzykys festivāla “Osvalds 2008” gaitā, kurais sovukuort itūgod nūtiks jau 14. reizi.
