Latgolys Radejis zinis (28.07.2008.)
Šudiņ 16. Eiropys tautu festivālā Rēzeknē uzastuos uorvalstu kolektivi nu Spānejis, Francejis, Dānejis, Lītovys, Beļgejis, bet nakts koncertā “Youth night” (“Jaunīšu nakts”) Latvejis tūris gaitā uzastuos dīdžeju apvīneiba “Sonar Musique”. Sovukuort restorana “Latgale” Lelajā zalā šudiņ uzastuos džeza trio “Stafeckis&Co”, 29. i 31.julī – Rēzeknis bigbends, bet 30.julī – flamenko gitārists Andris Kārkliņš.Šudiņ Rēzeknis naktspatversmis telpuos, Raiņa īlā 9b, nu devenim reitā leidz trejim piecpušdinē pilsātā deklarātom saimem (personom) suoks izsnīgt putraimus, informej Rēzeknis dūmis sabīdriskūs attīceibu specialiste Gunta Zīmele. Lai sajimtu putraimus, byus vajadzeigs uzruodeit Socialuos apryupis puorvaļdis izsnīgtū izziņu par tryuceigys saimis (personys) statusu. Vīns cylvāks varēs sajimt vīnu kilogramu putraimu.
Izgleiteibys procesā vysom īsaisteitajom pusem ir sova atbiļdeiba i konkreti aizdavumi, kas juoveic, kab nūdrūšynuotu kvalitativu, pīejamu i resursu ziņā puordūmuotu izgleiteibys sistemu. Tai paguojušnedeļ apmeklejūt školys i sazateikūt ar školuotuojim, školu direktorim i pošvaļdeibu vadeituojim Saldus i Preiļu rajonūs uzsvēre izgleiteibys i zynuotnis ministre Tatjana Koķe (ZZS). Jau ziņuots, ka pīktdiņ, 25. julī izgleiteibys i zynuotnis ministre apmekleja Preiļu orūdvydusškolu, Preiļu Vaļsts ģimnazeju i Preiļu nūvoda dūmi, kab ar školu vadeituojim, školuotuojim i pošvaļdeibu vadeituojim sprīstu par izgleiteibys aktualitatem eipaši administrativuos reformys kontekstā.
Aizvadeitajā dīnnaktī ir sasamazynuojuse kravys automašinu rynda iz Latvejis i Krīvejis rūbežys Terehovys rūbežkontrolis punktā, kur ryndā itūreit gaida 200 kravys mašynys, kas ir iz pusi mozuok nakai vakar. Sovukuort Grebņevys rūbežkontrolis punktā kravys automašinu rynda fektiski nav mainejusēs – tur ryndā gaida 150 automašynys, kas ir par desmit kravys automašynom vairuok nakai vakar.
