Gods latgalīšu kulturys gazetai

14.julī palīk gods, kai oficialai dorbu uzsuoce portals latgalīšu volūdā Lakuga.LV („Latgalīšu Kulturys Gazeta”). Pa itū laiku škārsteikla adresu ir apsavieruši 34 tyukstūši skaiteituoju, tymā īvītuoti vairuok kai 400 dažaidu materialu, kai ari vysaidi aproksti par gaidamajim nūtykumim, koncertim i cyta latgalīšim aktualuo informaceja.

Portals ir demokratisks – kotrs var īzasaisteit tuo papyldynuošonā voi vysmoz komentēšonā. Portala autori aicynoj sevkuru – skaiteit, syuteit materialus voi raksteit komentarus latgaliski. Niule uzsuokts jauns dorba virzīņs – vairuoki latgalīšu sabīdreibā pazeistami cylvāki ir suokuši raksteit dīnrokstus, kas iz pasauļa vairuok pazeistama kai „blogeru” kusteiba.

Goda laikā Lakuga.LV pa eistam klivuse par vītu, kur sazateik dzejnīki i rakstnīki, studenti i pasnīdzieji, rēzeknīši, daugavpilīši i reidzinīki, entuziasti i pīredzis boguotī, muzykanti i jūs atbaļsteituoji. Portalu kasdīnys apmeklej vaira par 150 cylvāku, kotru dīnu tys teik boguotynuots vysmoz ar vīnu jaunu viesti. Portalā atrūnami ari konkretuos sadaļuos (literatura, folklora, doba, muzyka, volūda u.c.) publicāti roksti, audio i video materiali, kas kūpā ir ari sovdabeiga enciklopedeja – tei ļaun vysim interesentim uzzynot, kas Latgolā lobs nūtics pyrms goda voi kas nūtiks tyvuokajā laikā. Lakuga.LV publicej ari skanātys gruomotys. Lakuga.LV ir breivuo ustoba i dzejis, i prozys, i muzykys autorim (portalā var klauseitīs ari „Latgolys Radeju”).

Portals pījam vysus rokstus, kam ir kaida saisteiba ar latgaliskajim procesim i nūtykumim. Na vysod roksti ir nu klaidom izteireiti, deļ tam portala autori atzeimej, lobuok raksteit ar klaidom, nakai naraksteit pavysam.

Ka ari Tev ir kū pastuosteit latgaliski, tod rokst iz e-adresu: lakuga@latgale.lv, i tymā pošā dīnā Tevis raksteitais byus izlaseits na tikai Latgolā, bet ari iz vysa pasauļa, kur latgalīši dzeivoj, struodoj, runoj i meklej, kas škārsteiklā jauns latgalisks.

Portala izveidi atbaļsteja Latgolys Kulturys programa (Latgolys regiona atteisteibys agentura i Kulturkapitala fonds). Bīdreibys „Latgolys Studentu centrs” izstruoduotuo projekta mierkis: radeit interaktivu ustobu deļ jaunuokajom viestem, diskusejom, vīdūkļu apmaiņai, deļ informacejis par gaidamajim nūtykumim vysim sabīdriski aktivajim latgalīšim naatkareigi nu jūs realuos dzeivisvītys.

Leidz ituo goda beigom Lakuga.LVreizi mienesī veidoj drukuotu pīlykumu laikrokstā „Latgales Laiks”, nuokamais „Latgalīšu Gazetys” pīlykums gaidoms juļa beiguos.

Vysi Lakuga.LV skaiteituoji i atbaļsteituoji teik aicynuoti 19.julī iz ituos vosorys leluokū latgalīšu muzykys koncertu „Taiseits Latgolā / Made in Latgola”, lai kūpeigi nūsvynātum ari portala goda jubileji. madeinlatgola.lv