Vosorys “Citrona škieleite”
![](https://lpr.gov.lv/wp-content/uploads/2008/caja-vokors/1129.jpg)
![](https://lpr.gov.lv/wp-content/uploads/2007/bodrap-bildis/981.jpg)
Muna īceineituokuo čaja ir malnais Earl grey ar soldonū kriejumu i 1,5 lizeikom cukra. Taipat pateik ari mate čajs, atsevišķūs breižūs augļu čajs ar vysaidu augļu daleņom I grenadinu. Čaju parosti dzeru tod, kod gribīs nazkū īdzert eipaši nadūmojūt, bet dažuos reizēs tū puorvieršu par vasalu procesu. Madu līku kluotu tod, kod asu slims (bet tod parosti dzeru līpu zīdu voi kumeleišu čaju).
![](https://lpr.gov.lv/wp-content/uploads/2008/caja-vokors/1074.jpg)
Munys īceineituokuos čajis ir piparmātru i kumeleišu. Sovu eipašū recepti juoizmontoj tod, kod ir gadejusīs sasaauksteišunuos i tai kai maņ bolss ir cīš svareiga dzeivis i kasdīnys sastuovdoļa, daīt dzert itū čaju, kab lītys ītu iz lobū pusi. Taitod: ingvera saknis čaja ar citronu – 4-5 šķieleitēs sagrīzta ingvera sakne, 2 škieleitis citrona, verdūšs iudiņs i mads. Vyspuor čaju kasdīnā saīt dzert bīžai – gon vokorūs pi kaidys lobys filmys, gon gostūs, gon ari pyrma koncertim pateik sasikdeit bolsu ar čaju, kam nūdar tei muna recepte. Čajam līku kluot madu (1 čaja lizeiku), bet ka mada nav pa rūkai tod var iztikt ari ar vīnu lizeiku cukra.
![](https://lpr.gov.lv/wp-content/uploads/2008/edite/1208.jpg)
Asu īcīnejs vysys dabeiguos čajis. Tys ruodīs nu bierneibys, kod laukūs babeņa taiseja kumeleišu, līpu zīdu i piparmātru čajis. Ari tāņ dzaru dabeiguos čajis. Čaju dzeru kotru reiztu. Pateik ari zaļuo čaja ar madu i citronu! Zīmā eipaši! Dažu reizi čajam dalīku kluot pīnu, nu cukru nalītoju, tik madu ci dažu reizi zapti. Kod maņ suop kokls, saaukstāts ci puorpyulāts, dzeru čaju ar svīstu. Parosti vysi smejuos, bet itaida recepte teišom paleidz nūvierst kokla suopis. Itaida čaja meikstynoj koklu i tys maņ kai dzīduotuoja ir cīš aktualai!
![](https://lpr.gov.lv/wp-content/uploads/2008/caja-vokors/1209.jpg)
Asu lels čajis draugs! Nui, soldonumam izmontoju madu ci cukru! i padaudz… Tys tai – Afrikys stilā, kur cukrys nateik taupeits… ir tik daudzi, ka čaja lizeika stuov! 🙂 Čaju vysu bīžuok dzaru vokorūs, nu reitim rešuok… Dorbā prīškrūku dūdu mate – eipašai čajai, kū dzer nu izžuovāta garbuza caur dzelža salmeņu. Mate ir lobuok kai kopeja!!! Ari īdarbeiguma zinī. Itū gon dzeru bez cukra 🙂
![](https://lpr.gov.lv/wp-content/uploads/2008/caja-vokors/1210.jpg)
Maņ pateik vysys dabiskuos čajis – līpu zīdu, kumeleišu, piparmātru, bet taidys eipašys receptis nav. Napateik malnuos čajis. Čaju dzeru parosti nu reitim. Eipaši piparmātru čaju – maņ pateik vyss, kas ir ar piparmātrom. Kluotu čajai gon parosti nikuo nelīku, deļ tuo, ka tai čajs lobuok atceina organismu.