Latgolys Radejis zinis (12.06.2008.)
![](https://lpr.gov.lv/wp-content/uploads/2005/dezuratteli/79.jpg)
Atkluos Kuorsovys slimneicys izramontātuos telpys. Šudiņ nūtiks Eiropys Regionaluo atteisteibys fonda (ERAF) leidzfinasātuo projekta “Primārās veselības aprūpes pakalpojumu pieejamības, efektivitātes un kvalitātes uzlabošana Kārsavas novadā” svineiga atkluošona. Lai veseleibys specialistim nūdrūšynuotu īspieju snīgt augstuokys kvalitatis apryupis pakolpuojumus, projekta laikā Kuorsovys slimneicā tyka veikts telpu kosmetiskais remonts, kai ari kanalizacejis, iudinsvoda i syltumapguodis sistemu rekonstrukceja. Projekta realizacejai beja napīcīšami 231 200 latu, tymā skaitā valsts budžeta leidzekļi 37 500 latu apmārā, ERAF leidzfinansejums 168 800 latu apjūmā i Kuorsovys pošvaļdeibys budžeta leidzekļi – 24 900 latu.
Šudiņ Daugavpiļs dūmys talpuos suoksīs opoluo golda diskuseja par atkareibu profilaksi i jaunu HIV profilaksis centru izveidi. Pasuokumā planuots diskutēt par HIV i narkomaneju, tū izplateibys tendencem pasaulī, narkomanejis mozynuošonys strategeju, Latvejis nūstuodnem, pošvaļdeibu i Sabīdreibys veseleibys agenturys sadarbeibu HIV izplateibys īrūbežūšonā. Kai atkareibu profilaktiskuos darbeibys i kaitejumu mozynuošonys pozitivais pīmārs pīsadaleit pasuokumā uzaicynuoti Jākubpiļs puorstuovi. Itymā piļsātā atsarūn i jau vairuokus godus veiksmeigi HIV profilaksis pasuokumus starp narkotiku lītuotojim realizej profilaksis kabinets.
Šudiņ tiks sasaukta SIA “Komunāls R” dybynuotuoju uorkuortys sapuļce, kurā planuots skateit vaicuojumu par uzjāmuma valdis lūcekļa Vasīlija Aleksejeva atbreivuošonu nu īnamamuo omota i, īspiejams, jauna valdis lūcekļa īceļšonu.
13.junī Valsts rūbežsardzis koledžā (VRK), Rēzeknē, tiks organizāts VRK absolventu izlaidums. Koledžu pabeidz 1.leimeņa profesionāluos augstuokuos izgleiteibys studiju programmas “Robežsardze” 29 kluotīnis i 16 nakluotīnē studejūšī.