Latgolys Radejis zinis (5.06.2008.)
Šudiņ finanšu ministrs Atis Slakteris dorba vizitē apmeklēs Daugavpili. Vizitis gaitā ministrs tiksīs ar Daugavpils pilsātys dūmis vadeibu. Ministrs apmeklēs Valsts ījāmumu dīnesta Latgolys regionalū īstuodi kai arī Daugavpls cītūkšņa kompleksu. Sovukuort zemkūpeibys ministrs Mārtiņš Roze Daugavpilī atkluos jaunū Lauku centra āku, dorba vizitis ītvorā tiksīs arī ar Daugavpils Lauku konsultaceju biroja darbinīkim i apmeklēs zemnīku saimnīceibys, kuramuos nūsadorboj ar lauku tūrismu.Viļānu kultūrys nomā nūtiks Zemkūpeibys ministrejis informativais seminars “Lauku atteisteiba: programma i atbolsts 2007.-2013. godam”. Seminarā lauksaimnīki i citi interesenti tiks informāti par Lauku atteisteibys programmys 2007.-2013. godam nūsacejumu aktualitatem i īvīsšonys progresa aktualitatem, kai arī par valsts lauku teiklu i pasuokuma “Leader+” aktualitatem.
Šudiņ tiks sveikta saimei draudzeiguokuo atpyutys vīta Latgolā. Bārnu i saimis lītu ministrs Ainars Baštiks vīnūs īsarass Daugavpilī, kab apsveiktu dobys parka “Daugovys lūki” direktoru Jāni Silavu ar titula “Saimei draudzeiguokuo atpyutys vīta Latgolā 2008” dabuošonu.
Vakar Rēzeknē atvārtys Austrumlatvejis daudzfunkcionaluo centra ākys metu devīzis i paziņuoti konkursa uzvarātuoji, par lobuokū dorbu atzeits SIA „Vizuālās modelēšanas studija” mets, kura devīze ir „Zīdaste”.
Nu šudiņdīnys leidz svātdinei Jākubpilī nūteik pylsātys svātku pasuokumi. Šudiņ vokora septeitajā stuņdē Viesturis muzeja breivdobys nūdaļā “Sieļu sāta” nūtiks Pļaveņu īlys īdzeivuotuoju tikšonuos i tiks atkluota “Pļaveņu īla Jākubpilī”.
