„Lakuga.lv” nu škārsteikla īt pi ļaudim

20.majā Daugavpiļs muokslys duorzā „Glīmezs” nūtyka „Latgalīšu kulturys gazetys” (škārsteikla lopys Lakuga.lv), kas teik saukts ari par Latgolys ļaužu portalu, prezentacejis pasuokums, veļteits darbeibys goda jubilejam.

Stuostejums par Latgalīšu kulturys gazetys sataiseišonys procesu tyka boguotynuots ar muzykantu Arņa i Edgara muziciešonu. Kai puiši pastuosteja, jī pasuokuma laikā asūt izdzīdovuši treju grupu („Dabasu Durovys”, „Mared” i „Yann&Latgalians”) dzīsmis. Leidz vālai stuņdei ilga sarunys par vysaiduokim latgalīšu vaicuojumim, pīvadumam, jaunū „Lakuga.lv” projektu, kas nu maja beigu suoksīs sadarbeibā ar laikrokstu „Latgales Laiks”. Tuo ītvorā raizi mienesī tiks izdūts avīzis pīlykums latgalīšu volūdā ar nūsaukumu „Latgalīšu gazeta”.
Pauokumā pīsadaleja ari jaunais latgalīšu litrats Raibais Suņs, kas nūskaiteja vairuokus sovus dzejis jaunumus.

Par „Lakuga.lv” pīdzimšonu… 2006. goda rudinī Valentins Lukaševičs, kas ir lels Latgolys patriots, dzejnīks un pasnīdziejs puorrunova sovys idejis ar ūtru vysa latgaliskuo patriotu, Latgolys Studentu centra puorstuovi Juri Viļumu (Jureits) i obeji nūsprīduši, ka latgalīšim juosazateik na tikai pa svātkim voi pa leluocim latgalīšu sabraukumim, bet ari škārsteiklā. Pasuokuma dalīnīkim Valentins Lukaševičs pastuosteja, ka jau 2007.goda pavasarī beja pījamts galeigs lāmums par „Lakuga.lv” taiseišonu, deļ tam ka atbolsts tyka sajimts ari nu Latgolys Regiona atteisteibys agenturys vadeituos Latgolys kulturys programys i dalīknūt sovu entuziasmu, dorbs varie suoktīs. Latgolys Studentu centra izstruoduotuo projekta mierkis beja: radeit interaktivu ustobu (deļ jaunuokajom viestem, diskusejom, vīdūkļu apmaiņai, deļ informacejis par gaidamajim nūtykumim) visim sabīdriski aktivajim latgalīšim naatkareigi nu jūs realuos dzeivisvītys.

2007.goda 14.julī „Lakuga.LV” oficialai uzsuoce dorbu. Jau tymā dīnā portalā beja ap 100 daižaida satura materiali. Leidz itam laikam davīnuoti vēļ kaidi 250 materiali i pa viersu vysaidi aproksti par gaidamajim nūtykumim, koncertim. Niule uzsuokta jauns dorba virzīņs – vairuoki latgalīšu sabīdreibā pazeistami cylvāki ir suokuši raksteit dīnrokstus, kas iz pasauļa vairuok pazeistama kai „blogeru” kusteiba.

Portals ir demokratisks – kotrs var īzasaisteit tuo papyldynuošonā. Portala autori aicynoj sevkuru – skaiteit, syuteit materialus voi vysmoz raksteit komentarus.

Goda laikā „Lakuga.lv” pa eistam klivuse par taidu vītu, kur sazateik dzejnīki i rakstnīki, studenti i pasnīdzieji, rēzeknīši i daugavpilīši, entuziasti i pīredzis boguotī, muzykanti i jūs atbaļsteituoji. Portalu kasdīnys apmeklej vaira par 150 cylvāku, tys teik boguotynuots vysmoz ar vīnu jaunu viesti (cytu reizi par dīnu sazalosa ari kaidys četrys jaunys viests). Portalā atrūnami ari konkretuos sadaļuos (literatura, folklora, doba, muzyka, volūda u.c.) publicāti roksti, kas kūpā ir ari savdabeiga enciklopedeja, kas ļaun školānim, studentim i vysim interesentim uzzynot, kas Latgolā lobs nūtics pyrms goda voi kas nūtiks tyvuokajā laikā. „Lakuga.lv” publicej ari skanātys gruomotys, pīvadumam, viesturisku godagruomotu, kas izdūta 19. godusymta 60. godūs. Lakuga.lv ir breivuo ustoba i dzejis, i prozys, i muzykys autorim (portalā var klauseitīs ari „Latgolys radeju”).

Jureits un Valentins Lukaševičs, byudami „Lakuga.lv” redaktori, pījam vysus rokstus, kam ir kaida saisteiba ar latgaliskajim procesim i nūtykumim. Kai soka Jureits, lobuok raksteit ar klaidom, nakai naraksteit vyspuor.

Ka ari Tev ir kū pastuosteit latgaliski, tod rokst iz e-adresu: lakuga@latgale.lv, i tymā pošā dīnā Tevis raksteitais byus puorskaiteits na tikai Latgolā, bet ari iz vysa pasauļa, kur latgalīši dzeivoj, struodoj, runoj i meklej, kas škārsteiklā jauns latgalisks.