Pabeigta latgalīšu raksteibys reforma
![](https://lpr.gov.lv/wp-content/uploads/2007/lg/399.jpg)
Da ituo laika paraleli tyka lītuotys divejis ortografejis – Dr. phil. Pītera Stroda vadeibā izstruoduotī i 1929. godā Izgleiteibys ministrejis apstyprynuotī latgalīšu pareizraksteibys nūsacejumi i prof. Dr. habil. philol. Ontona Breidaka vadeibā 1996. godā izstruoduotī latgalīšu rokstu volūdys pareizraksteibys nūsacejumi.
Sabīdreibys attīksme pret O. Breidaka komisejis jaunynuojumim nabeja vīnnūzeimeiga. Ari paralela diveju raksteibu lītuošona naveicynoj rokstu volūdys atteisteibu, partū 2003. godā latgalīšu goreiguos i laiceiguos inteligencis diskusejā tyka nūlamts pabeigt P. Stroda vadeituos komisejis īsuoktū i napabeigtū, kai ari O. Breidaka turpynuotū ortografejis reformu i izveiduot vīnuotu rokstu volūdu.
Niule izstruoduotūs latgalīšu rokstu volūdys normu pamatā ir Dr. phil. Pītera Stroda vadeibā izstruoduotī ortografejis nūsacejumi, tymūs eistynuotys juo vadeituos komisejis narealizātuos īceris.
Izveiduot vīnuotu latgalīšu rokstu volūdys ortografeju 2003. goda februarī rūsynuoja Latgolys Studentu centra organizātuo volūdnīku, goreidznīku, kulturys darbinīku i rakstnīku diskuseja. Juos laikā vysys pusis aplīcynuoja vajadzeibu piec vīnuotys latgalīšu pareizraksteibys. Diskusejis rezultatā pi LR Tīslītu ministrejis Vaļsts volūdys centra Latvīšu volūdys ekspertu komisejys tyka izveiduota Latgalīšu rokstu volūdys apakškomiseja, kurys uzdavums beja pabeigt latgalīšu raksteibys reformu. Komiseja dorbu suoka 2003. gada junī, niu sabīdreibys viertiejumam teik nūdūti Latgalīšu pareizraksteibys nūsacejumi, kuri tyka pījamti LR Vaļsts volūdys centrā 2007. goda 28.septembrī i publicāti Latvijas Vēstneša 18. oktobrī.
„Vaļsts volūdys centra Latvīšu volūdys ekspertu komisejis Latgalīšu rokstu volūdys apakškomisejis izstruoduotī Latgalīšu pareizraksteibys nūsacejumi byuteibā ir Dr. phil. Pītera Stroda vadeituos komisejis napagiutuo dorba pabeigšona. Kotra rokstu volūda ir kompromisa variants storp dzeivuos volūdys izlūksnem i rokstu volūdys tradiceju. Bet kompromiss ir vajadzeigs, lai latgalīšu rokstu volūdys lītuotuoju reiceibā byutu kūpeigys pareizraksteibys normys. Dīvamžāļ ilgais ar aizlīgumim saisteitais puorruovums latgalīšu rokstu volūdys lītuojumā, kai ari nasakuortuotuo raksteiba nav bejuse labvieleiga volūdys atteisteibai. Reformys pabeigšona beja napīcīšama, lai nūdrūšynuotu kvalitativu latgalīšu rokstu volūdys lītuojumu. Izstruoduotī Latgalīšu pareizraksteibys nūsacejumi ir baļsteiti Latgolys izlūkšņu pietejumūs. Normu nūteikšonai ir apzynuoti dažaidu volūdys paruodeibu plašuoka lītuojuma areali, deļtuo vairuokūs gadīņūs nūsacejumūs teik pīļauti raksteibys normu varianti,” atzeist Latgalīšu ortografejis apakškomisejys prīkšsādātuoja Dr. philol.A. Stafecka.
Nasaverūt iz vairuokim latgalīšu raksteibys aizlīgumim, myusu dīnuos latgaliski runoj i roksta kai vacuokuo, tai i videjuo i jaunuokuo paaudze. Latgalīšu rokstu volūda pylnveidojās, atsateista – taipat kai kotra dzeiva volūda. Ar laiku var rastīs napīcīšameiba precizēt atseviškus nūsacejumu punktus. Latgalīšu raksteibys apakškomiseja aicynoj interesentus īpazeit pīduovuotūs nūsacejumus i izsaceit lītiškus prīšklykumus, kas byutu par lobu rokstu volūdys normu pylnveiduošonai.
Latgalīšu pareizraksteibys nūsacejumi ir publicāti elektroniskajā Latgalīšu kultyrys gazetā – škārsteikla sātyslopā www.lakuga.lv.
Seminaru „Latgalīšu pareizraksteibys nūsacejumi i latgalīšu raksteiba” organizej LR Tīslītu ministrejis Vaļsts volūdys centra Latvīšu volūdys ekspertu komisejis Latgalīšu ortografejis apakškomiseja i bīdreiba “Latgolys Studentu centrs” sadarbeibā ar Rēzeknis piļsātys dūmi i “Rēzeknis Latgalīšu kulturys bīdreibu”.
Latgalīšu pareizraksteibys nūsacejumu izdūšonu i seminara nūrisi atbolsta Latgolys Regiona atteisteibys agentura.
Vaira informacejis:
Ilze Sperga,
Latgalīšu ortografejis apakškomisejis sekretare
Mob. tel.: +371 29522432
E-posts: ortografeja@gmail.com
Informativais seminars „Latgalīšu pareizraksteibys nūsacejumi i latgalīšu raksteiba”