Dzejūli – P A V A S A R S
P A V A S A R S
* * *
Dabasūs navaida saule
A dzaltona breidynuojuma zeime.
Viejs giusta
Kurš puorsnādz uotrumu.
Mygla puorbauda
Ci nabeja veina.
* * *
Apsytu kuoji iz akmiņa.
Iz celim ruopoju pa teirumu.
Nazynu, kam tys pīdar.
Mekleju slīkys deļ zivim.
Bārni gryb nazkū stypruoku.
Da azaram juoīt stuņdi.
Ka naatīšu vairuokys dīnys,
Pabarojit munejū suni.
* * *
Izaruoda, ka dzērem vēļ olu.
Iz vādara nu nazkurīnis lyupu kruosa.
Svešys sīvītis laikam bučuoju tūnakt.
Garajūs motūs slaucieju sev kuojis.
Izaruoda, ka dzīduoju par skali.
Na sovu dzīsmi i na sovim vuordim.
Iz golda nūlics golvu i vārdamīs tymsā,
Stykla traukā sajaucs džinu ar puotorim.
Izaruoda, ka nivīnu tūreiz nanūsytu.
Hotelī braukdams iz augšu pīmeizu liftā.
Nu reita braukdams iz zamašku ūšņuoju
I dusmuojūs, kurs beja taids cyuka.
* * *
Piļsātā nikod napalīk tymss.
Nu i kas, ka ni eista saule.
Iuzys tože naaug iz kūku zorim.
Es tože agruok beju ībrids auzuos.
Meklieju dīvu kotrā gryudeņā.
Rauduoju par sameidātim stībrim.
Cikom pasauce mani jis nu ceļa.
Paprasēja paleidzēt samaineit rīpys.
* * *
Maņ bļūdeņa ir bolta.
A bareiba vysvysaida.
Šašlyks nu Rundānim.
I guļbys nu Cyskoda.
Bārzu sulys nu Pāpom.
I šņopss nu Rykovys.
Vysa kuo da koklam.
Sirds dzonoj sīkolys.
* * *
Jei roksta tai kai vajag.
Es rokstu tai kai irā.
No pasaule napalīk lobuoka.
Da i sirds nasalīk mīrā.
Pasaule napalīk i švakuoka.
Blūdeju braucūšā viļcīnī.
Gribieju izkuopt Rēzeknē.
A izlaide – Piļcinī.
* * *
Sataisu čaji puslitra burcenī.
Bryunū cukru nūlīku gostim.
Gaidu kod atīs meitine,
Balavuos ar sovim stuostim.
A es – seņ jau esmu dzeds.
Vacuoks par Andryvu Jūrdžu.
Atīt na vīna poša.
Kūpā ar Aļbertu Sprūdžu.
Ai, kaida zaraza!
Gryb, kab par jū ceinuos!
„Veirīts tak ir mednīks.”
A ka – bārna ašņs venuos?
* * *
Pa vysu ustobu mātojās Vaļuka goboli.
Nazynu, kū tu ar jim grybi darēt.
Tī ir uobeli, kas nūkrytuši nu uobeļneicys?
Nā, ūlys, kurys vari suokt perēt.
Piec laika izaškiļs smuki čāguoni.
A nu cytom taidi mozi bolūdeiši.
Aiztais lūgus i sapierc putraimus.
Putni ir lobuoki nakai veirīši.
* * *
Gluostu ceglus, bučoju asfaļtu,
Īmatu mašynā ašņainu kraklu.
Ar tekstim maņ par moz.
A Reiga maņ par saklu.
A Rāzna – pylna ar styklim.
Divys sīvītis. Vīnaiduos kleituos…
Vīnu dīnu verūs vysys programys.
Ūtrā dīnā staigoju zečuos pa leitu.
* * *
Muna volūda – nalela sūma.
Divim kukuleišim i vīnai golvai.
Cyti sapierk vysu iz nedeli,
A mes kotru dīnu iz veikalu.
Muna volūda palīk boltuoka.
Vairuok kriejuma līkom zupā.
Redzieju kai mozeņš bierneņš
Īlyka karūti i čajā.
Muna volūda – vairuok nikas.
Ar sovu kači es taidā runoju.
Kod sirdei palīk pavysam solts
Es ar taidu cepli kurynoju.
* * *
Jam napateik publiski pasuokumi.
Jis naatītu daže iz sovom bērem.
A sādātu kurta aiz pakseiša i vārtūs
Tikkū iz saulis gaismā tykušom cērmem.
Vīnu puslūdi tuos jau jam apādušys.
I kur jis nūgiva itaidus bacylus?
Cikom naīdeve grupu, storp sātom
Staipēja vysvysaida garuma kabeļus.
* * *
Dīnā nav izškireibys storp zvaigznem i sputnikim.
Sādūt sātā – storp slīkom i putnim.
* * *
Munam bruoļam navaida suoļa.
Napierk jis i cukru.
Ar acim dzer olūta iudini,
Ar muti klausuos vieja skanis.
Nivīns mes nazynom nu kurīnis
Jam iraida itaids spāks.
Obrazeņa vītā jam zūbu birsteite,
Kaladu vītā casnāgs.
* * *
Ols bakali smird pie hlorkys.
Iz vīna palykuse lyupu kruosa.
Divus kvartalus tuoļuok morgs.
Četrus pa kreisi – tenisa korti.
Jei vysu tū maņ pastuosta.
Es vīns pats svešā piļsātā.
– A kur pi jiusim počta?
Jei ar pierstu saņtimūs boksta.
* * *
Var dūt i divdesmit, var i četrdesmit.
Struodoj veikalā, koč beiguse muokslys školu.
Treissymts metrus iz dorbu īt vasalu stuņdi.
Zīmā dzer šņopsu, a vosorā – olu.
Ar hieroglifim apzeimējuse ustobā grīstus.
Dūmoj par naizabeidzīni, a prīcojās par šaļti.
Kotru reitu mūstās ap pus pīcim.
Lobim cylvākim jei dūd par veļti.
* * *
Gutāns jau dabasūs.
A jis – vēļ pa eļni.
Cikom jis līk butylkys,
Da cytim naīt valni.
Mīreigi varu vērtīs teliku.
Serials īt jau 40 godus.
Tai tys i byus, cikom kaids duraks
Napuorgrīzs eliktreibys vodus.