Latgolys aktivitates parokstu vuokšonā
Rēzeknē par grūziejumu īrūsynuošonu Satversmē pasarakstejuš 2870 personys, kas ir aptuvenai 10% nu pylsātā dzeivojūšīm bolsstīseigīm. Leluokuo vieleituoju aktivitate nūvāruota aizvakar, kai arī vakar. Itamuos dīnuos pazarakstiejušīs aptuvenai 500 cylvāku. Beja pat izaveiduojušuos nalelys ryndys. Parokstu vuokšonys vītuos lykumpuorkuopumi voi citaidi storpgadejumi nav nūvāruoti.Jākubpilī parokstu vuokšonā par lykumprojekta “Grūziejumi Latvejis Republikys Satversmē” īrūsynuošonu pasarakstiejuš 2694 cylvāki jeb aptuvenai 15% nu visim bolsstīseigajim. Daugavpilī īdzeivuotuoju aktivitate bejuse nadaudz zamuoka – nu 62 150 bolsstīseigī par mynātū lykumprojektu pasarakstiejuš aptuvenai 7000.
Nu ituo goda 14.apreļa VAS “Latvejis dzelzceļš” (LDz) izsludynoj Spūdreibys mienesi, kura laikā kompanejis vadeiba reikuos ikgadejūs pavasara apbraucīņus, bet darbinīki pīsadaleis sastdinis tolkuos teritoreju uzkūpšonai. Nu 15. leidz 17.apreļam pavasara apbraucīņs nūtiks Latgolys regiona dzelzceļa linejuos, suokūt nu Pļaveņom i da pīrūbežys stacijom – Zylupei, Indrai, Kuorsovai i Kurcumam. Spūdreibys mieneša laikā nūtiks apbraucīni arī Ventspils, Līpuojis, Meitenis i Reņgis stacejis virzīnī.
Pošvaldeibys AS “Davgavpils syltumteikli” izsludynuojuse atkluotu konkursu par kogeneracejis īkuortu nomu lokalajom kotlumuojom “Čerepova” i “Ruģeli”. Īkuortys uzjāmums plānoj iznūmuot iz 10 godim. Konkursa nūlykumu interesenti var sajimt AS “Davgavpils syltumteikli” sekretariatā, 18.novembra īlā 4. Pīduovuojumi konkursam īsnīdzami tīpat da 15.majam plkst.10.00. Viertejūt sajimtūs pīduovuojumus, konkursa komiseja golvonū uzmaņeibu veļtās tus saimņīciskejam izdeveigumam.
Šudin Davgavpils dūmis Etniskajā centrā nūtiks informacejis dīna etniskom bīdreibom. Informacejis dīnā Davgavpils ukraiņu bīdreiba “Mrija” prezeņtēs Eiropys Komisejis puorstuovnīceibys Latvejā finanseitū projektu “Volūdu – daudz, šyupuļdzīsme – vīna”. Kotra bīdreiba informies kluotasūšūs par svareiguokīm sovys bīdreibys pasuokumim aprelī i majā. Pasuokumā pīsadaleis vysys 14 Davgavpilī registreituos etniskuos bīdreibys – latvīšu, latgalīšu, krīvu, pūļu, ebreju, čyguonu, boltkrīvu, lītuvīšu, vuocu, ukraiņu i tatāru bīdreiba, kai arī Latgolys studentu centrs.
Šudiņ Rēzeknis augstskūlā (RA) nūtiks Informacejis dīna, kurā vydsskūlāni i cyti interesenti varies īgiut informaceju par studeju īspiejom itymā izgleiteibys īstuodē. Studenti tiks īpazeistynuoti ar 40 studeju programmom, studeju īspiejom kaidā nu 65 augstuokuos izgleiteibys īstuodem uorzamēs studentu apmainis programmuos, studejūšū pošpuorvalžu dorbu i aktualitātem, kai arī īspiejom pīsadaleit uorpusstudeju studentu aktivitātēs. Pasuokumā paradzāti arī dažaidi konkursi i aktivitātis, kuru daleibnīkim paradzātys bolvys ar RA simboliku. Atvārtūs durovu dīna RA Ekonomikys fakultatē suoksīs plkst.10.00, savukuort Pedagogejis, Humanitārūs i juridiskūs zynuotņu i Inženeru fakultatis – plkst.12.00
