Latgolys Radejis zinis (10.04.2008.)
![](https://lpr.gov.lv/wp-content/uploads/2005/dezuratteli/79.jpg)
Šudiņ Terehovys muitys kontrolis punktā iz Latvejs i Krivejis rūbežis paradzāts prezentēt jaunū transportleidzekļu i konteineru automatiskuos identificiešonys sistemu. Kai informej VID Latgolys regionāluos īstuodis Biroja prīkšneica Ingrīda Geriņa, paradzāts, ka prezentācejā pīsadaleis arī finanšu ministrs Atis Slakteris, VID ģenerāldirektors Dzintars Jakāns i cytys omotpersonys.
Ituo goda pyrmajūs treis mienešūs par 50% pasalelynuojs ar narkotikom saisteitūs nūzīgumu skaits Daugavpilī i rajonā. Pārnuo goda pyrmajūs treis mienešūs Daugavpilī i Daugavpils rajonā tyka registrāti 17 itaidi nūzīgumi, bet itūgod jau 34. Ar narkotikom saisteitūs nūzīgumu skaits cīši pīaudzs arī Aizkrauklis rajonā, Gulbenis, Jēkabpils, Ludzys, Talsu i Preiļu rajonā.
Šudiņ Rēzeknē svineigai tiks atkluoti cītūs sadzeivis atkrytumu savuokšonys konteineru laukumi Reigys īlā 21b i Zylupis īlā 50, iz kurim īdzeivuotuojim byus īspiejams bezmoksys nūguoduot šķiruotūs atkrytumus. Kotra laukuma plateiba ir 1200 kvadratmetri, tymūs izvītuoti 30 konteineri ar kūpejū ītylpeibu 62,3 kubikmetri. Konteineri paradzāti papeira, kartona, makulaturys, polietilena, plastmasys, stykla i tekstila audumu savuokšonai, kai arī metala i kūksnis atkrytumu savuokšonai. Atkrytumu savuokšonys laukumūs izvītuoti arī konteineri-nūlyktovys nūlītuotom automašinu rīpom i konteineri lela izmāra atkrytumu savuokšonai.