„Latgalīšu Etnokulturys centra” bīdru sasatikšona Aglyunā

Ituo gods 9.martā nūtyka pyrmuo bīdreibys „Latgalīšu Etnokulturys centrs” bīdru kūpsapuļce. Saulainuo i pavasareiguo dīna Aglyunā beja puļcēja ap 20 bīdreibys bīdru i atbaļsteituoju.

Kai jau svātdinis dīnā pījimts, bīdri nu suokuma pulcējuos Aglyunys Bazilikā iz dīvkolpuojumu. Kūpsapuļcis turpynuojums nūzarysynova Aglyunys Maizis muzejā.

Bīdreibys vaļdis prīkšsādātuojs Arturs Uškāns acaskaitēja par Bīdreibys darbeibu 2007.-2008.godā. Bīdreibys izpilddirektore Inta Uškāne snīdze atskaiti par naudys ļeidzekļu izmontuošonu. Sovukuort Bīdreibys projektu vadeituoja Anna Briška īpazeistynova kluotasūšūs bīdrus i atbaļsteiyuojus ar darbeibys plānu i īcerem 2008.godam.

Kūpsapuļcis turpynuojumā nūtika revidenta vieļiešonys, kuru rezultātā par revidentu tyka apstyprynuots Raimonds Zarāns.
Tyka nūlemts, ka Bīdreibys bīdri leluokys kūpā saīšonys varātu reikuot 2 raizis godā. Tys varātu paļeidzēt atteisteit Bīdreibys ideju reaļizēšonu, kai arī uzlabuotum „Latgalīšu Etnokulturys centra” dorbu.

Bīdreibys kūpsapuļcis laikā tyka puorrunuoti arī prīkšlykumi statūtu izmaiņom. Turpmuok valdis lūcekļi (Artūrs Uškāns, Inta Uškāne, Anna Briška) byus tīseigi puorstuovēt bīdreibu kotrs atsevišķi, navis visi kūpā, kai tys beja ļeidz šam.

Tyka aicynuots kotrs bīdrs suokt ekspediceji sovā sātā, apzynuot sovu tyvuokū (īsokams – dzymušu leidz 1940. g.) dzeivis pīredzi, fiksēt atmiņis un saglobuot tuos kaidā nu datu nesiejim. Rudinī vysi īgiutī materiali tyktum apkūpuoti, taidā veidā turpynojūt veidot bīdreibys folklorys ekspedīceju datu bāzi.

Bolstūtīs iz materialim, ir plānuots rudinī veiduot plašuoka mārūga pasuokumu, kur bīdreibys bīdri stuosteitu par sovu pīredzi ekspedicejuos.

Ja ari portala „LaKuGa” skaiteituojam ir fotomateriali, kurus byutum vajadzeigs saglobuot (eipaši, kur radzami muzykys instrumenti, muzykanti, dorba reiki, tolku, kuozu u.c. svineibu nūrise, leidz 20. gs. 70. godim), lyugums tūs syutēt bīdreibys foto arhiva specialistam Robertam iz e-posta adresi: roberc.org@inbox.lv.

Kūpsapuļcis turpynuojumā tyka baudeitys pušdīņis eistynā Latgolys tradicionaluos kuknis stilā, par kū beja pazaryupējušīs Aglyunys Maizis muzeja darbinīki ar Vijis Ancānis vadeibā. Taipat arī Vija Ancāne „Latgalīšu Etnokulturys centra” bīdrus i atbaļsteituojus īpazeistynova ar Maizis muzeju i aizrauteigi stuostēja par tradīcejom, kas saisteitys ar maizi.

Juosoka ļelu paļdis Vijai Ancānei par jaukū i sirsneigū uzjimšonu pi sevis – Maizis muzejā! Kai arī paļdis valdis lūcekļim par kūpsapuļcis organizēšonu, i golu golā paļdis visim bīdrim i atbaļsteituojim, kuri atroda laiku i vareibu sasatikt kūpsapuļcē!