Voi latgalīšus dzierdēs Eiropā?

Šūgod pyrmū reizi, startejūt Eirovizejis Nacionalajā atlasē “Eirodziesma 2008”, pusfinālā storp 20 dzīsmem tyka īkļauta ari grupys Borowa Mc dzīsme ‘The One’ (Vīneiguo). Var saceit, ka šūgod Nacionalajā atlasē startej Latgolys trīcīnvīneiba – kūpeigai izpiļdeit dzīsmi Borowys puiši aicynuojuši arī grupys „Bez PVN” dvēseli Kipu (Kristaps Rasims).

„Piec rezultatu paziņuošonys tyka raksteits, ka itūgod Nacionalajā atlasē pīsadoluos dzīsmis vīneigi angļu mēlī, nu ite mes grybātu ībiļst! Mes cīš grybom, kab latgalīšu volūda itymā godā izskaņ na tik viņ Latvejis, bet ari vysys Eiropys mārūgā. Mes byutu patīšom lapni, ka vysai Eiropai varātu pastuosteit, ka ir taids bezgola breineigs i skaists nūvods Latgola i ka ite runoj sovā – latgalīšu volūdā, kas ir skaista i skaneiga,” tai par Eirovizeji i sovom puordūmom itymā sakorā stuosta grupys līders Aigars Runčis.
Dzīsme stuosta par mīlesteibu. „Par kū gon cytu var dzīduot?” prīceigs prosa grupys gitārists Ingars Gusāns. „Tok tyvojuos pavasars, i ir miljons dūmu, kab mīlesteibys vuordā vysu dareit lobuok!”
Izlūzis kuorteibā Borowa Mc starteis pyrmajā pusfinālā, kas byus radzams LTV1 ēterā 2. febralī plkst. 21:45. Īslēdz televizoru itymā laikā i jiuti leidza sovejim – Tovs atbolsts ir svareigs! Jautuojums palīk atkluots – voi latgalīšus dzierdēs Eiropā?